Prabebs 23:1-26

¹If yu jidan blanga dagat daga garram eni king yu garra dagat daga raitwei.

²Yu nomo go jis blanga dagat bigismob daga. Yu garra meiksho yu nomo dagat tumatj.

³Yu nomo gridi blanga ol detlot gudwan daga. Maitbi im trai blanga trikim yu.

⁴Yu stap dumbat olkain ting blanga meigim miselp jidan ritjwan.

⁵Det mani blanga yu gin binijap kwikbala jis laik im abum wing laik igulok weya flaiwei kwikbala.

⁶Yu nomo dagadagat daga garram detkain pipul hu nomo wandim sherimbat enijing, en yu nomo gridibala blanga dagat det gudwan daga blanga im.

⁷Detkain pipul oldei luk haumatj yu dagat en dei dalim yu, “Kipgon dagat mowa,” bat dei nomo tok trubalawei.

⁸Wal yu garra baku det daga weya yubin dagat en yu garra weistim ol yu kainwan wed.

⁹Yu nomo tok langa silibala pipul. Dei kaan lisin langa yu sabibala wed.

¹⁰Yu nomo go en mubum det bandri mak brom det pleis weya im jidan en yu nomo teikoba det kantri blanga detlot pipul hu nomo garram mami o dedi.

¹¹YAWEI det trubala God, im na det brabli strongbalawan hu oldei maindimbat olabat, en im garra tok blanga olabat.

¹²Teiknodis blanga ola gudbala wed en len wanim yu titja titjimbat yu.

¹³Yu garra streitinimap yu biginini olabat en yu garra beldim olabat. Tharran kaan kilim olabat ded,

¹⁴en bambai olabat garra jinggabat nomo blanga dum lagijat, en tharran mait seibum olabat laif.

¹⁵Main biginini olabat, if yumob jidan sabibala langa yumob main, wal yumob garra meigim mi brabli gudbinji.

¹⁶En if yumob tok ola trubala wed, wal ai garra rili gudbinji.

¹⁷Yumob nomo jelas blanga detlot nogudbala pipul. Yumob garra oldei shoum rispek langa YAWEI.

¹⁸If yumob dum lagijat, wal yumob garra abum det brabli gudwan laif en jidan longtaim.

¹⁹Main biginini olabat, yumob lisin en yumob garra jidan brabli sabibala, en yumob garra kipgon jinggabat gudwei blanga bulurrum det raitwanwei.

²⁰Yumob nomo jidan drangginbala o laigim dagadagatbat loda daga,

²¹dumaji wen yumob jidan lagijat, tharran meigim yumob jidan leisibala en yumob garra jidan powan en werrimonbat rabishwan klos.

²²Yumob garra lisin langa yumob dedi en yumob nomo fogedabat yumob mami wen im olgamen.

²³Yumob garra len blanga abum gudwan main en jidan trubalawei, en yumob garra len en sabi mowa en nomo fogedabat tharran.

²⁴Yumob garra meigim yumob dedi brabli gudbinji wen yumob jidan raitwei en dumbat ola brabli gudbala ting.

²⁵Yumob garra meigim yumob mami en dedi gudbinji blanga yumob en yumob mami garra jidan brabli gudbinjiwei.

²⁶Main boi, yu garra teiknodis langa mi brabliwei en yu wotjim wanim mi oldei dumbat.