18E melengien xil ak, inou niteh rat Ninin Eo navan ha ise xat moletin navan xil vus ituxoh tiramue e atou xil mun xa labe slev tang. Reitin, xil mun, ti lihit lelen sepinien navan xil.
19Inou nipol ni holesok xil xa tellep listal e tilang hat, e nipisen xeihen navan e ut etan. E ut etan, nipol ni holesok xil listal ixoni melele te vaeen: ra ileh, e upang e eas ituvan e ut ngasen.
20E tilang hat, meteneai mei imaluxoluk, e aveti imei ipili ixoni ra. Melele xa moletin xil lipus holesok xil ak mei istal, lipus kila xa melengien xa eilep na Hi Suv sangas vastal xa mei ilepis rin na moletin xil vus.
21E melele nen ak, ngan xil vus xa likes nou ve tutouen, inou, Hi Suv, niteh meulien e xil.’”
22Pita biteni mun mi xil bit, “!Tuxoli xil te hal Isrel, muteong ni sepinien xil ak! Melele xa Iesu te hal Nasaret teta tamu tetel xamim, Hi tepisen kila xa xi tehe Mesaea nan texo xeihen xa tesa ni mini tengan vapol ni merekel xil e holesok sav xil xa tellep pe valnaomim xa vasak ni mutemanin. Xamim vus mukil kuhi xa ngan ak be reitin.
23E nggusil lingxatien nan, Hi xa mikil holesok xil vus xa di mistal teling Iesu pe hemim. E xamim, mutesa maten mini melele xa mutexeih xat ngan xil xa latahusil ti rae xil na Hi tengan liti xati e eivave.
24E Hi tesak ni temea rilomun ra maten tengan nahur ti mun longpangasien teni. Vengan xa xeihen te maten misakras vahur xati.
25Ngan ak nggoni ngan xa suv toto Deved tetiamu tehit lelen ni usil Iesu tehit, ‘Vehakut, napus Hi Suv de riuk metu. E uluk nakan ti vengan xa xi de visal nou.
26Reitin, nabesi nou e nasa memesien ba mini. E naling nenesien navan en xa isikoe xol tenbeok.
27Reitin, nakila xa namaen ninin navan ti nate von maten. E namaen ni ti tiei navan, moletin eo nan, tengan navolel e vul te tehinen.
28Xi pisen suse te meulien minou. Nihesi nou vehakut vengan xa xi de visal nou.’”
29Pita biteni mun mi vanut moletin xil bit, “Tuxoli xil te hal Isrel, inou nihiteni imal tang mi xamim usil Deved, avu nar. Xi temat, e latetihin ni. E von tehinen nan da tak duxoh xosali.
30Rakila xa xi tehe provet tei. Xi tekila xa Hi tepol ni hitxatien te xeih tei mini xa isak ni tei e vatimol nan ihur voninen e mei ihe suv toto.
31Suv toto Deved tepus kil naha xa Hi ipol ni e melengien xil xa ti imei. Ma tesep usil mea rilomunen na Mesaea melele xa tehiteni tehit, ‘Hi namaen ninin navan ti nate von maten. E namaen ni ti tiei navan, moletin eo nan, tengan navolel e vul te tehinen.’
32Ngan ak di misepin usil Iesu xa Hi tesak ni temea rilomun ra maten, e xamem vus matepusi xa be reitin.
33Hi tepet rati tehe ut nesao tengan ha vate von xeihen xa de rin metu. E Tamen tesa Ninin Eo mini nggoni ngan taxa xi tehit xati mi xamem. E taxeak, naha xa mupusi e mulonge be Ninin Eo ak xa Iesu di misa ni mi xamem.
34Xir vus rakila xa tenave suv toto Deved ti iaxa tehe ut nesao. E Deved vari tang tesepin usil Iesu Kristo melele xa tesa sepinien ak tehit, ‘Hi Suv biteni mi Suv navan bit, “Utotan e riuk metu,
Polien 2
Polien 2:18-34