Pisalem 94:3-23

³E waalooloo behee go digau huaidu ma ga manawa lamalia? E waalooloo behee, meenei Dimaadua?

⁴E waalooloo behee go digau hai mee hala ma ga hagamuamua, mo di hagapuu gi nadau hai hai mee hala?

⁵Meenei Dimaadua, digaula e hai haga huaidu au daangada, e hagammaemmae au daangada.

⁶Digaula gu daaligi gii mmade nia ahina ala guu mmade nadau lodo mo nia dama ala nadau maadua ai, gei e daaligi gii mmade digau mai i daha ala e noho i di madau henua.

⁷Digaula e hai boloo, “Dimaadua hagalee mmada mai gi gimaadou. Di God o Israel le e de gidee Ia gimaadou.”

⁸Agu daangada, goodou e aha ala e longo buna gei e dadaulia? Goodou e kabemee ma gaa hee?

⁹God ne hai tadau dalinga, Mee e deemee di hagalongo? Mee ne hai tadau golomada, Mee e deemee di mmada?

¹⁰Mee e hagaoho hagawelewele gi nia daangada, Mee hagalee ga daaligi digaula? Mee tangada agoago ni digau huogodoo, Mee ana kabemee ai?

¹¹Dimaadua e iloo Ia nadau mee ala e hagamaanadu. Mee e iloo ia nia balu hagamaanadu ala i nadau lodo.

¹²Meenei Dimaadua, e tenetene hualaa behee go au daangada ala e aago, digau ala e aago Kooe gi au haganoho!

¹³Goe guu hai digaula gi hagamolooloo gi daha mo nia laangi haingadaa, gaa dae loo gi di luwa dela guu geli belee hele ai digau huaidu.

¹⁴Dimaadua la hagalee kili gi daha ana daangada. Mee hagalee diiagi ana daangada.

¹⁵Di tonu gaa gida labelaa i lodo nia gowaa hai gabunga, gei digau huogodoo ala e humalia ga hagamaamaa di maa.

¹⁶Ma koai dela gu duu aga e hagamaamaa au e hai baahi gi digau huaidu? Ma koai dela gu madalia au e hai baahi gi digau ala e hai nadau mee huaidu?

¹⁷Maa nei bolo Dimaadua la ne hagalee hagamaamaa au, gei au gu limalima hua di hana gi tenua o digau mmade.

¹⁸Au gu helekai, “Au gaa doo”, gei do aloho dee modu gu daahi au, Meenei Dimaadua.

¹⁹Dogu madagoaa ma ga de nnoomaalia ge hagabaubau e logo, gei Goe e hai au gi manawa lamalia ge hai labelaa au gi tenetene.

²⁰Goe hagalee hiihai gi digau hai gabunga huaidu, ala e hai nia mee ala e bule go taganoho bolo hudee heia,

²¹go digau ala e haganohonoho nadau hai ala belee hai baahi gi digau humalia, e hagi aga digaula e daaligi gii mmade.

²²Gei Dimaadua gu hagamaamaa au, dogu God gu abaaba au.

²³Mee ga daaligi digaula i digaula ala ne hai nadau hai huaidu, ga haga mmaa digaula gi daha i nia hala digaula ala ne hai. Dimaadua go tadau God ga daaligi la digaula gi hagalee.