Pisalem 86:2-13

²Haga dagaloaha ina au gi daha mo di made, idimaa au e manawa dahi adu gi di Goe. Haga dagaloaha ina au, idimaa au tangada hai hegau ni aau, gei au e hagadagadagagee adu gi di Goe.

³Goe di God ni oogu, malaa, Goe gi manawa dumaalia mai gi di au. Au e dalodalo adu gi di Goe mai i nia luada gaa hana gi di boo.

⁴Meenei dogu Dagi, heia dau dangada hai hegau deenei gi tenetene, idimaa au dela e hai aga agu dalodalo gi di Goe.

⁵Goe e humalia mai gi gimaadou ge e manawa dumaalia, gei e honu i di aloho dee modu ang gi digau huogodoo ala e dalodalo adu gi di Goe.

⁶Meenei Dimaadua, hagalongo mai gi dagu dalodalo, hagalongo mai gi dagu gahigahi i di hagamaamaa.

⁷Au e gahigahi Goe i nia madagoaa haingadaa, idimaa Goe dela e haga gila agu dalodalo.

⁸Ma deai di god e hai be Goe ai, meenei Tagi, ma tangada ne hai ana mee be au mee ala ne hai ai.

⁹Nnenua llauehe huogodoo ala ne hai Kooe ga lloomoi, ga pala adu gi di Goe. Digaula ga hagaamu do ingoo.

¹⁰Goe e mogobuna ge e hai au hagadilinga mee hagagoboina, ma deelaa hua Kooe di God.

¹¹Aago ina au, meenei Dimaadua, gi au mee ala e hiihai ginai belee hai ko au, gei au ga hagalongo adu gi di Goe mo di manawa dahi. Aago ina au gi di hai dela e hai hegau adu gi di Goe mai i lodo dogu manawa hagatau.

¹²Meenei dogu Dagi go dogu God, au ga hagaamu Goe mai i lodo dogu manawa hagatau. Au ga hagalaamua do ingoo gaa hana hua beelaa.

¹³Idimaa e damanaiee hualaa behee go do aloho deemodu i di au! Goe ne haga dagaloaha au gi daha mo taalunga.