7Digaula gu tomo aga gei gu maaloo mai i di nadau lloo adu, gei digaula ga gidee di God o nia god i hongo Zion.
8Meenei Yihowah go di God Koia e Aamua, hagalongo mai gi agu dalodalo. Meenei di God o Jacob, hagalongo mai!
9Meenei God, goe gi hagahumalia ina di madau king, di king dela ne hilihili Kooe.
10Di laangi hua e dahi i lodo do Hale Daumaha, la koia e humalia i nia laangi e mana (1,000) i nia madagoaa ala i golo. Dogu duu i di ngudu di bontai di abaaba o di Hale o dogu God, la koia e humalia i di noho i lodo nia hale o digau huaidu.