Pisalem 74:3-23

³Hanimoi gii mmada Goe gi nia gowaa mooho aanei. Madau hagadaumee gu oho nia mee huogodoo i lodo di Hale Daumaha.

⁴O hagadaumee ne wwolowwolo i lodo do Hale Daumaha bolo ginaadou gu aali. Digaula guu hudi gi nua nadau hagallebe i golo, e hai ai di hagailongo ni di aali.

⁵Digaula guu hai gadoo be digau hele laagau, e duuduu nadau laagau gi nia dalai.

⁶Digaula gu hahaahi nia haaligi laubaba gi nia dalai mono haamaa llauehe.

⁷Digaula gu oho do Hale Daumaha, guu dudu di maa gii wele, gu haga milimilia di gowaa dela e hagalaamua ai au daangada do ingoo.

⁸Digaula gu hiihai bolo ginaadou e hai gimaadou hagahuaidu, digaula guu dudu nia gowaa haga madagu huogodoo ala i lodo tenua deenei.

⁹Tadau ada mee haga madagu huogodoo gu hagalee. Nia soukohp gu hagalee labelaa, gu deai hogi tangada e iloo ia be di hai deenei le e waalooloo behee ai.

¹⁰Meenei God, e waalooloo behee go madau hagadaumee di nadau haganneennee Goe? Digaula e mee di haga balumee do ingoo gaa hana hua beelaa?

¹¹Goe e aha dela hagalee hagamaamaa gimaadou? Oo lima e dugu gi doo dua eimaha?

¹²Meenei God, Goe nogo hai di king ni gimaadou mai loo i taamada. Goe nogo haga dagaloaha gimaadou i nia holongo e logowaahee.

¹³Goe ne wwae di tai gi oo mahi aamua, ga haga mamaawa nia libogo o di manu haga madagudagu dangada o lodo tai.

¹⁴Goe gu dagadagahi nia libogo o di manu dragon go ‘Leviathan’ ga haangai nia manu lodo henua gi tuaidina o maa.

¹⁵Goe ne hai nia wai gii mmidi, ge ne hai nia monowai llauehe gi maangoo.

¹⁶Goe ne hai di aa mo di boo, ge ne haga noho di laa mo di malama gi nau lohongo.

¹⁷Goe ne haga noho au madagoaa gi henuailala, ge ne hai di madagoaa mahanahana mo di madagoaa magalillili.

¹⁸Meenei Dimaadua, gi langahia bolo o hagadaumee le e gadagada adu gi di goe. Digaula la digau huaidu gei digaula e hagawelewele adu gi di Goe.

¹⁹Goe hudee diagia au daangada ala gu deai nadau hagamaamaa ai gi nadau hagadaumee hagamuamua. Goe hudee de langahia au daangada ala e hagaduadua!

²⁰Goe gi langahia dau hagababa dela ne hai mai gi gimaadou. Ma iai taaligi dangada gii made e haihai i lodo nia gowaa bouli o tenua deenei.

²¹Goe hudee heia digau ala guu noho i lodo nadau hagahuaidu gi langaadia. Goe heia digau ala e hagaloale mo digau haadanga balua gi hagaamu ina Goe.

²²Meenei God, du gi nua, abaaba ina Goe! Goe gi langahia bolo digau huaidu le e gadagada adu gi di goe mai loo luada gaa hana loo gi di boo.

²³Hudee de langahia nia wwolowwolo hagawelewele o hagadaumee, nia hagalongoaa ala e haihai go digaula la hagalee noho.