Pisalem 69:6-36

⁶Meenei Tagi, go Yihowah di Gowaa Aamua, Goe hudee heia au gi haga langaadia digau ala e hagadagadagagee adu gi di Goe. Meenei di God o Israel, hudee heia au gi hagatee ina digau ala e daumaha adu gi di Goe.

⁷Au gu haganneennee go nia daangada mai i do ingoo, malaa, au gu langaadia huoloo.

⁸Au guu hai gadoo be tangada mai i daha i baahi ogu duaahina, ge guu hai gadoo be tangada henua gee i baahi dogu madahaanau.

⁹Dogu haa manawa i nia madamada o do Hale Daumaha la guu gaa i ogu lodo gadoo be di ahi. Nia haganneennee ala e hai adu gi di Goe le e dau labelaa i di au.

¹⁰Au e manawa hila gi lala i dogu noho hagaonge, gei nia daangada e haganneennee au.

¹¹Au e ulu di gahu haga manawa gee, gei digaula e gadagada mai gi di au.

¹²Digaula e leelee i di au i hongo nia ala. Digau libaliba e dili nadau daahili i di au.

¹³Gei au, au ga dalodalo adu gi di Goe, meenei Dimaadua. Helekai mai gi di au i do madagoaa dela gu hiihai ginai, meenei God. Helekai mai gi di au, mai i do aloho aamua, ge idimaa Goe dela e dadaahi hua dau hagababa dela bolo Goe e hagamouli au.

¹⁴Hagamaamaa ina au gi de abulu gi lodo di gelegele waiwai. Haga dagaloaha ina au i ogu hagadaumee, haga dagaloaha ina au gi daha mo di moana llala.

¹⁵Hudee heia au gii gahu go nia wai mmidi. Hudee heia au gi melemu gi tua di moana, be e abulu gi lodo taalunga.

¹⁶Meenei Dimaadua, hagalongo mai mua gi di au mai i tumaalia o do aloho dee odi. Goe huli mai mua gi di au mai i do manawa dumaalia aamua.

¹⁷Goe hudee hagammuni ina Goe i dau dangada hai hegau deenei. Au guu noho i lodo di haingadaa damanaiee, hagamaamaa ina au dolomeenei!

¹⁸Hanimoi gi di au, haga dagaloaha ina au. Goe daawa au gi daha mo ogu hagadaumee.

¹⁹Goe dela e iloo nia helekai haganneennee ala e hai mai gi di au mo dogu haga balumee mo dogu haga langaadia. Goe dela e gidee ogu hagadaumee huogodoo.

²⁰Nia haganneennee gu oho dogu manawa, deai di mee e mee di hagamaamaa au ai. Au gu hiihai huoloo bolo tangada gi hagamaamaa ina dogu manawa gee, gei di maa hagalee. Au ne halahala dagu dangada belee haga manawa lamalia au, gei au digi gidee.

²¹Dogu madagoaa nogo hiigai, gei digaula ga gaamai gi di au nia poisin. Au nogo hieinu, gei digaula ga gaamai gi di au nia ‘vinegar’.

²²Nia hagamiami digaula la gi heia nia mee e hagahuaidu digaula. Nia hagamiami digaula la gi heia nia mee haadanga balua ang gi ginaadou.

²³Hagabouli ina nia golomada digaula! Heia nia dua digaula gi paagege i nia madagoaa huogodoo!

²⁴Goe llingi iha do hagawelewele gi hongo digaula. hagahuaidu ina digaula gi do hagawelewele.

²⁵Nia gowaa ala e noho ai digaula gi diagia gii hai nia gowaa lomo. Hudee heia tangada e dahi gi mouli i lodo nadau hale laa.

²⁶Digaula e hagahuaidu au daangada ala ne hagaduadua Kooe. Digaula e helehelekai i di hagaduadua o au daangada ala ne haga mmaemmae Kooe.

²⁷Hagailongo ina nia huaidu huogodoo digaula. Hudee heia digaula gi hai mee gi dau hagamouli.

²⁸Nia ingoo digaula la gi tono ina gi daha mo di beebaa ingoo o digau ala e haga mouli. Hudee daulia digaula gi baahi au daangada donu.

²⁹Malaa, au guu noho i lodo dogu mmae mo dogu manawa gee. Dahi aga ina au, meenei God, haga dagaloaha ina au!

³⁰Au ga hagaamu di ingoo o God gi taahili. Au ga hagadele nia humalia o Maa gi dagu hai danggee gi Mee.

³¹Deenei di mee ga haga manawa lamalia a Dimaadua i hongo nia tigidaumaha ala e hai gi nia kau, koia i hongo di tigidaumaha dela e hai gi di kau daane damanaiee.

³²Digau ala e manawa daamaha gaa mmada gi di hai deenei, ga manawa lamalia. Digau ala e daumaha ang gi God ga manawa maaloo.

³³Dimaadua e hagalongo ang gi digau ala gu deai nadau mee ai, gei mee hagalee e de langahia ana daangada ala i lodo di hale galabudi.

³⁴Di langi mo henuailala mo di moana mono hagahonu huogodoo i no lodo, goodou huogodoo hagaamuina a God.

³⁵Mee ga haga dagaloaha Jerusalem, gaa hau haga hoou nia waahale o Judah. Nia daangada donu a Maa gaa noho i golo ga hai mee gi tenua deelaa.

³⁶Di hagadili ni ana gau hai hegau ga hai mee gi tenua deelaa, mo digau ala e aloho i God gaa noho i di gowaa deelaa.