Pisalem 68:2-15

²E hai gadoo be nia huiahi ma ga ili gi daha, deelaa gadoo di hai a Mee ma ga hagabagi digaula gi daha. E hai be nia ‘wax’ ma ga waiwai i mua di ahi, deelaa gadoo digau huaidu ma ga hagalee i mua o God.

³Gei digau ala e donu le e manawa lamalia ge tenetene i mua o Mee. Digaula e tenetene mo di wwolowwolo tenetene.

⁴Daahili ang gi God, daahili hagaamu ina di ingoo o Maa. Hagatogomaalia ina di ala o Mee dela e hana i hongo nia gololangi. Di ingoo o Maa go Yihowah, goodou tenetene i mua o Mee!

⁵God dela e noho i lodo dono hale dabu, le e madamada humalia i nia dama ala gu deai nadau maadua ai, mo e abaaba nia ahina ala guu mmade nadau lodo.

⁶Mee e wanga gi digau ala e hagaloale nia gowaa digaula e noho ai, gei e dagi digau galabudi gi daha gi lodo di gowaa moholo mo di tenetene, gei digau ala e hai baahi la gaa noho i lodo tenua maangoo.

⁷Meenei God, do madagoaa nogo dagi au daangada, mo do madagoaa nogo hana i lodo di anggowaa,

⁸gei henuailala nogo ngalungalua, nia uwa guu too iha i di langi, idimaa go di hanimoi o di God dela nogo helehelekai i tomo di Gonduu o Sinai, di hanimoi o di God o Israel.

⁹Goe gu haga doo iha dau uwa nngolo belee hagahumalia au henua ala gu maangoo.

¹⁰Au daangada gu haga noho nadau guongo i golo, idimaa go do humalia dela ne hagahumalia digau hagaloale.

¹¹Di Tagi ne helekai, gei nia ahina dogologowaahee guu kae di longo boloo:

¹²“Nia king mo nadau gau dauwa guu hula guu llele gi daha!” Nia ahina ala i nadau guongo gu duwweduwwe nadau goloo ala ne kumi:

¹³ala go nia ada mwuroi guu hii gi nia silber, nia bakau digaula e dabadaba i nia goolo humalia. Ma e aha dela hunu gau i goodou e noho hua i lodo nia abaaba siibi i di laangi nogo hai tauwa?

¹⁴Di madagoaa o God Mogobuna ne hai nia king gi lellele dagidahi i hongo di Gonduu Zalmon, Mee guu hai nia ‘snow’ gi monnono i golo.

¹⁵E aamua huoloo behee go di Gonduu Bashan, di gonduu e logo ono ulu gonduu!