Pisalem 66:4-16

⁴Digau huogodoo i hongo henuailala e daumaha adu gi di Goe, digaula e daahili adu gi di Goe i nia daahili hagaamu, e daahili e hagaamu do ingoo.”

⁵Lloomoi gii mmada goodou gi nia mee a God ala ne hai, nia hegau haga goboina a Mee ala ne hai ang gi nia daangada.

⁶Mee ne huli di moana gii hai tenua maangoo. Tadau maadua mmaadua nogo taele i lala i lodo di monowai. I di gowaa deelaa, gei gidaadou gu tenetene huoloo gi di mee a Mee dela ne hai.

⁷Mee e dagi gi ono mogobuna gaa hana hua beelaa, gei Mee e dadaumada nia henua llauehe. Digau ala e de hiihai e hagalongo la gi hudee hai baahi gi Mee.

⁸Goodou go nia daangada o nia henua huogodoo, hagaamu ina di madau God. Nia lee o godou hagaamu gi heia gi longono gi nia madagowaa huogodoo.

⁹Mee e benebene gidaadou gi dee mmade, ge hagalee hai gidaadou gii too gi lala.

¹⁰Meenei God, Goe gu hagamada gimaadou, gadoo be nia silber e haga madammaa gi di ahi, deelaa dau hai gu hagamada gimaadou.

¹¹Goe guu hai gimaadou gi monnono gi lodo di hele, ga haga uda gi hongo madau dua nia mee daamaha.

¹²Goe guu hai gimaadou gi dagadagahi go madau hagadaumee. Gimaadou guu hula i lodo di ahi mo di labagee, gei dolomeenei gei Goe gu laha mai gimaadou gi lodo di gowaa noho i di aumaalia.

¹³Au ga gaamai dagu tigidaumaha dudu gi doo hale. Au ga gowadu gi di Goe dagu mee dela ne hagababa.

¹⁴Au ga gowadu gi di Goe agu mee ala ne hai iei au bolo e gowadu i dogu madagoaa nogo i lodo di haingadaa.

¹⁵Au ga gaamai agu siibi e dudu i hongo di gowaa dudu tigidaumaha, gei au ga tigidaumaha adu gi di Goe nia kau daane mo nia kuudi, gei nia huiahi o nia tigidaumaha aalaa gaa hula gi nua gi di langi.

¹⁶Lloomoi hagalongo, go goodou huogodoo ala e hagalaamua a God, gei au ga hagi adu di mee a Mee dela ne hai mai gi di au.