Pisalem 57:1-8

¹Dumaalia mai gi di au, meenei God, dumaalia mai, idimaa au e hanadu e halahala dogu hagamaamaa gi doo baahi. I lala di malu oo lima e gida ai dogu abaaba gaa dae loo gi di lawa o nia haingadaa huogodoo.

²Au e gahigahi dogu God dela i di Gowaa Aamua, di God dela e hagahumalia au gi agu mee ala e hiihai ginai huogodoo.

³Mee ga helekai mai i di langi, ga haga dagaloaha au. Mee ga haga magedaa digau ala e hagahuaidu au. God ga hagamodongoohia mai dono aloho dee modu mo dono manawa dahi.

⁴Ogu hagadaumee gu haganiga mai dogu gili, e hai gadoo be nia laion gai dangada. Nia niha digaula e hai gadoo be nia daalo mono amu maalei. Nia holole digaula e hai gadoo be nia hulumanu dauwa gaa.

⁵Meenei God, hagamodongoohia ina do aamua i di langi, mo do madamada i hongo henuailala hagatau.

⁶Ogu hagadaumee guu holo di nadau gubenge belee kumi au. Au gu deai dogu hagadagadagagee ai. Digaula guu geli di nadau luwa i ogu mua bolo gii doo au gi no lodo, gei di maa go digaula ne monnono gi lodo.

⁷Meenei God, dogu hagadagadagagee guu dohu, gei au ga daahili mo di hagaamu Goe!

⁸Dogu hagataalunga, ala aga! Dagu ‘harp’ mo dagu ‘lyre’, aala aga! Au ga hangahanga di laa gii ala.