Pisalem 51:6-18

⁶Goe e hiihai gi di manawa madammaa ge e donu. Haga honu ina ogu hagamaanadu gi do kabemee.

⁷Daawa ina gi daha ogu huaidu, gei au ga madammaa. Gaugau ina au, gei au koia ga madammaa giagia i nia ‘snow’.

⁸Heia au gi hagalongo gi nia lee tenetene mo manawa lamalia. Ma e aha maa Goe gu haga mooho ogu dudaginga mo ogu iwi, gei au ga manawa lamalia laa.

⁹Huli gi daha mo ogu huaidu, weedee ogu huaidu huogodoo.

¹⁰Meenei God, heia mai gi ogu lodo di manawa madammaa, gaamai gi ogu lodo di hagataalunga hoou ge manawa dahi.

¹¹Hudee hudu ina au gi daha mo Goe. Hudee daawa ina dau Hagataalunga Dabu la gi daha mo au.

¹²Gaamai labelaa di tenetene dela e hanimoi i do hagamouli. Heia au gi hiihai e hagalongo adu gi di Goe.

¹³Gei au ga aago au haganoho gi digau huaidu, gei digaula ga maaliu mai gi di Goe.

¹⁴Meenei God dogu Hagamouli, Haga dagaloaha ina dogu mouli, gei au ga manawa lamalia ga hagadele oo donu.

¹⁵Meenei Dimaadua, hagamaamaa ina au gii mee au di helekai, gei au ga hagaamu Goe.

¹⁶Goe hagalee hiihai gi nia tigidaumaha, maa nei bolo Goe e hiihai, gei au gaa hai adu gi di Goe. Goe hagalee e manawa tene gi nia tigidaumaha dudu.

¹⁷Meenei God, dagu tigidaumaha la go di maaliu donu o dogu manawa. Goe hagalee bae gi daha di maliu donu o dogu manawa mo dogu manawa hila gi lala.

¹⁸Meenei God, Goe gi manawa dumaalia gi Zion. Hagamaamaa ina a mee. Hauhia labelaa nia abaaba o Jerusalem.