Pisalem 50:2-18

²Di madamada o God le e mamaahina mai i Zion, go di waahale madamada hagatau.

³Tadau God e hanimoi, malaa, hagalee hanimoi deemuu. Di ahi maaloo e ulaula i mua o Mee, di madangi maaloo e haganiga i di gili o Mee.

⁴Mee ga gahigahi di langi mo henuailala belee hai ono hagadootonu e mmada ang gi de Ia dela e gabunga ana daangada.

⁵Mee ga helekai, “Haga dagabuli ina mai agu daangada manawa dahi gi dogu baahi, go digau ala ne hai nadau hagababa mai gi di Au mai i nadau tigidaumaha ne hai.”

⁶Di langi e hagamodongoohia bolo God le e donu, ma go Mee dela tangada hai gabunga.

⁷“Hagalongo, go agu daangada, gei Au ga helekai. Au gaa hai dagu hagamodongoohia hai baahi adu gi di goe, Israel. Au go God, go doo God.

⁸Au hagalee gabunga goe i au tigidaumaha mo nia tigidaumaha dudu ala e haihai kooe mai gi di Au i nia madagoaa huogodoo.

⁹Au hagalee hiihai e kae agu kau daane mai i dau abaaba, be nia kuudi mai i lodo dau hagabuulinga kuudi.

¹⁰Nia manu huogodoo ala i lodo henua mono kau ala i tomo nia gonduu e mana la nia mee ni aagu.

¹¹Nia manu mamaangi huogodoo mono mee huogodoo ala e mouli i lodo henua la nia mee ni aagu.

¹²“Maa nei bolo Au ma ga hiigai, Au hagalee madau agu meegai adu gi di goe, idimaa, henuailala mono mee huogodoo ala i no lodo la nia mee ni aagu.

¹³E hai behee? Au e gai nia goneiga kau daane, be e inu nia dodo kuudi?

¹⁴Heia dau tigidaumaha danggee ang gi God, mo di wanga gi di Gowaa Aamua au mee huogodoo ala ne hagababa ang gi Mee.

¹⁵Gahigahi ina Au i do madagoaa haingadaa, gei Au ga haga dagaloaha goe, gei goe ga hagaamu Au.”

¹⁶Gei God ga helekai gi digau huaidu, “Goodou e aha ala e agoago agu haganoho? Goodou e aha ala e leelee i agu hagababa?

¹⁷Goe e de hiihai gi di Au dela e aago goe, goe guu kili gi daha agu haganoho.

¹⁸Goe e hagadau ihoo gi digau gaiaadanga huogodoo ala ma ga gidee goe, gei goe e hagadaubuni ang gi nia daane mono ahina mouli be nia manu.