Pisalem 49:10-19

¹⁰Di ingoo hua tangada e mee di mmada bolo digau kabemee le e mmade labelaa, gadoo be digau dadaulia mo digau boiboi. Nia hagadili digaula ga hai mee gi nia maluagina digaula.

¹¹Nia daalunga digaula ala nia hale digaula ga hana hua deeodi, aalaa nia gowaa e noho ai digaula gaa hana hua beelaa, ma e aha maa digaula nogo hai mee gi nia gowaa i mua.

¹²Tadau mahi le e deemee di daa gidaadou gi daha mo di made. Gidaadou e mmade hua gadoo be nia manu.

¹³Mmada be ma di aha dela gaa hai ang gi digau ala e bida hagadagadagagee ang gi ginaadou, mo di hagaodi gi muli o digau ala e tenetene gi nadau goloo.

¹⁴Digaula guu lawa di haga noho bolo digaula gaa mmade gadoo be nia siibi. Di made dela gaa hai di hagaloohi o digaula. Ma ga luada, gei digau ala e haihai nia mee donu ga aali i hongo digaula. Nia huaidina digaula e limalima di pala i lodo tenua o digau mmade, e mogowaa mo nadau guongo.

¹⁵Gei God ga haga dagaloaha au. Mee gaa daa au gi daha mo di mogobuna o di made!

¹⁶Hudee manawa logo maa tangada ma ga maluagina, maa nia maluagina o maa ga logo mai ga logowaahee.

¹⁷Mee e deemee di kae nia maa madalia ia i dono madagoaa ma gaa made. Nia maluagina o maa hagalee hula madalia a mee gi lodo taalunga.

¹⁸Ma e aha maa tangada e manawa lamalia gi dono mouli, ga hagaamu go nia daangada i mee dela e gila humalia,

¹⁹gei mee gaa made ga madalia ono maadua mmaadua ala e noho i di gowaa bouli dongoeho dela e waalooloo beelaa dono hagaodi ai.