Pisalem 44:4-24

⁴Goe go dogu king mo dogu God. Goe e hai au daangada gi aali.

⁵Gimaadou e haga magedaa madau hagadaumee gi oo mahi.

⁶Au hagalee hagadagadagagee gi dagu maalei be go dagu hulumanu dauwa bolo dela ga haga dagaloaha au.

⁷Gei Kooe hua dela ne haga dagaloaha gimaadou gi daha mo madau hagadaumee, ge gu haga magedaa digau ala e hagadugina e ginaadou mai gi gimaadou.

⁸Gimaadou ga hagaamu Goe i nia madagoaa huogodoo, ge danggee adu gi di Goe ga hana hua deeodi.

⁹Gei dolomeenei, Goe gu diiagi gimaadou gi magedaa. Goe gu hagalee madalia madau gau dauwa.

¹⁰Goe ne hai gimaadou gii llele gi daha mo madau hagadaumee, madau goloo guu kae go digaula.

¹¹Goe ne hai gimaadou gi dadaaligidia gadoo be nia siibi. Goe ne hagamodoho gi daha gimaadou gi nia henua mai i daha.

¹²Goe ne hui au daangada donu gi di hui dulii be di mee digaula hagalee loo e dahidamee.

¹³Madau gau ala i madau baahi e mmada gi dau hai dela ne hai mai gi gimaadou, gei digaula ga haganneennee gimaadou ga gadagada mai gi gimaadou.

¹⁴Goe guu hai gimaadou gii hai nia mee haga gadagada dangada i baahi nia daangada. Digaula e gadagada ge lialiagi nadau libogo mai gi gimaadou.

¹⁵Nia madagoaa huogodoo, gei au gu haga balumee, au gu langaadia huoloo

¹⁶i dogu longono eau nia gadagada mono helekai haganneennee mai baahi ogu hagadaumee mo digau ala e hagadugina e ginaadou i di au.

¹⁷Nia mee huogodoo aanei gu hai mai gi gimaadou, ma e aha maa gimaadou digi de langahia Goe, be e oho au hagababa ala ne hai Kooe mai gi gimaadou.

¹⁸Gimaadou digi diagia Goe, gimaadou digi de hagalongo gi au haganoho.

¹⁹Gei goe guu kili gimaadou gi daha gi baahi nia manu lodo henua. Goe gu diiagi gimaadou gi lodo di bouli dongoeho.

²⁰Maa nei bolo gimaadou guu dugu di madau hai daumaha adu gi di Goe, go di madau God, ga dalodalo gi di god huagee,

²¹gei Goe gu iloo hua, idimaa Goe e iloo hua madau maanadu ala e nngala.

²²Idimaa Kooe dela ne hidi ai gimaadou e dadaaligi gii mmade i nia madagoaa huogodoo, e hai gadoo be nia siibi ma ga daaligi.

²³Ala aga, meenei Dimaadua! Goe e kii eiaha? Nnoo i nua! Hudee diagia gimaadou beelaa!

²⁴Goe e hagammuni Goe i gimaadou eiaha? Goe hudee de langahia madau dadaaligi mo madau haingadaa!