Pisalem 35:6-17

⁶Heia nia ala digaula gi bouli ge gi malali i di madagoaa tangada di langi o Dimaadua ma gaa kili digaula gi lala!

⁷Digaula guu dugu di nadau hele belee hele iei au, gei au dagu mee hala ne hai gi digaula ai, mo di geli di nadau lua llala belee kumi au.

⁸Malaa, taaligi gaa hai hua gi digaula gei digaula de iloo. Digaula gaa bida kumi go nadau hele gaa too gi lala, gaa mmade!

⁹Malaa, gei au ga manawa lamalia, idimaa go Dimaadua. Au ga tenetene, idimaa Mee dela gu haga dagaloaha au.

¹⁰Au ga helekai gi Dimaadua mai i lodo dogu manawa hagatau boloo, “Ma tangada e hai be Goe ai. Goe e abaaba digau paagege i digau maaloo, mo digau hagaloale i digau ala e hai haga huaidu digaula.”

¹¹Digau huaidu e hai nadau haga modongoohia hai baahi mai gi di au, ge e haga huaidu au gi nia mee hala ala e de iloo eau.

¹²Digaula e hui mai gi agu hegau humalia gi nia huaidu, malaa, au gu bagege ogu lodo.

¹³Malaa, di madagoaa digaula nogo magi, gei au gu ulu ogu goloo manawa gee, gaa bida noho hagaonge belee hagaduadua au. Au e bala gi lala e dalodalo,

¹⁴gadoo be au e dalodalo i dogu ihoo haga tenetene, be go dogu duaahina daane. Au e heehee manawa gee bala gi mua, gadoo be tangada ma ga manawa gee gi dono dinana ne made.

¹⁵Malaa, dogu madagoaa nogo i lodo di haingadaa, gei digaula gu tenetene, ga mmui mai gi dogu baahi, ga haganneennee au. Digau tuadimee e dadaaligi au ge hagalee lawa di nadau haga mamaawa au.

¹⁶Digaula e mmada haga gulugulua mai gi di au gadoo be tangada ma ga gadagada haganneennee tangada habehabe.

¹⁷Meenei Dimaadua, e waalooloo behee go do daumada hua au gei deai dau mee e hai mai gi di au ai? Haga dagaloaha ina au gi daha mo teebagi digaula. Haga dagaloaha ina au gi daha mo nia laion aanei!