Pisalem 33:2-17

²Hagaamuina Dimaadua gi godou mee hai daahili, daahili gi Mee i nia uga o godou ‘harp’.

³Goodou daahili gi Mee i taahili hoou. Daahili gi Mee i nia lee humalia mai i godou mee hai daahili mo di wwolowwolo tenetene!

⁴Idimaa, nia helekai a Dimaadua le e donu, Mee e manawa dahi i ana mee huogodoo ala e hai.

⁵Dimaadua le e aloho di tonu mo di hai hegau donu. Henuailala guu honu i dono manawa aloho dee modu.

⁶Di langi la ne hai go Dimaadua gi ana helekai, gei ogo di laa, di malama mono heduu la ne hai labelaa gi ana helekai.

⁷Mee ne hagabuni mai nia moana huogodoo gi di gowaa e dahi, gaa tai nia hagahonu di moana gi lodo nia gowaa benebene mee.

⁸Digau huogodoo o henuailala, goodou gi mmaadagu i Dimaadua! Nia daangada huogodoo o henuailala, goodou hagalaamua ina a Mee!

⁹Mee ne helekai, gei henuailala guu gila. Mee ne helekai hua, gei nia mee huogodoo gu kila aga.

¹⁰Dimaadua e haga dee kila nia hagataele o nia henua, ga haga mmaa gi daha nia hagabaubau digaula.

¹¹Gei ana hagabaubau e noho hua beelaa. Nia hagataele a Maa ang gi dono hiihai le e noho hua beelaa.

¹²E maluagina go tenua dela di nadau God la go Dimaadua. E maluagina go nia daangada ala guu hili go Mee bolo e hai ana daangada!

¹³Dimaadua e mmada iha i di langi, e daumada gidaadou go nia daangada huogodoo.

¹⁴Mee e daumada digau huogodoo ala e noho i henuailala mai i dono lohongo aamua.

¹⁵Ma go Mee dela e hai nia daangada gii mee di hagabaubau, gei Mee e iloo Ia nia mee huogodoo ala e hai go digaula.

¹⁶Di king la hagalee aali mai i ana gau dauwa ala e maaloo. Tangada dauwa la hagalee aali mai i dono maaloo.

¹⁷Nia hoodo ala i tauwa la hagalee hai ana mee gi di aali, nia maaloo digaula le e deemee di hagamouli ginaadou.