Pisalem 32:1-10

¹E maluagina go tangada dela gu maahede ono huaidu, gu haga de langahia ono hala go God.

²E maluagina go tangada dela hagalee hai baahi ginai a Dimaadua i ana mee hala ne hai, gei mee gu mehede gi daha mo nia hagadilinga halahalau huogodoo.

³Dogu madagoaa dela digi haagia ogu huaidu, gei au nogo dangidangi duadua i di boo mo di aa.

⁴Meenei Dimaadua, Goe nogo hagaduadua au i di boo mo di aa, au gu deai ogu mahi ai, guu hai gadoo be nia magalillili o di luada ma ga maangoo i di welengina o di madagoaa mahanahana.

⁵Malaa, gei au gu haagi aga ogu huaidu adu gi di Goe. Au digi hagammuni agu mee hai hala ala ne hai. Au gu hagamaanadu bolo au e haagi adu nia maa gi di Goe, gei Goe gu dumaalia mai gi di au i ogu huaidu huogodoo.

⁶Malaa, au daangada huogodoo ala e manawa dahi gi dalodalo adu gi di Goe i nadau madagoaa haingadaa. Di madagoaa o di haingadaa dela e hai be di labagee damana ma gaa hai, gei di maa hagalee tale gi digaula.

⁷Goe la go dogu gowaa dela e bala hagammuni ginai au. Goe ga haga dagaloaha au gi daha mo nia haingadaa. Au ga daahili mo di hagaamu dau hagamouli, idimaa Goe dela e abaaba au.

⁸Dimaadua ga helekai, “Au ga hagi adu gi di goe di ala dela e hana iei goe. Au ga aago goe ga hagamaamaa goe.

⁹Goe hudee hai be di hoodo, be di ‘donkey’ dela hagalee e iloo nia mee, dela hua e humalia e wanga di baalanga mo dono loahi gi di ngudu o maa gi hagalongo a mee adu gi di goe.”

¹⁰Tangada hai mee huaidu le e hai gi hagaduadua, gei tangada dela e hagadagadagagee gi Dimaadua la gu abaaba go Mee gi dono manawa aloho dee modu.