Pisalem 27:11-14

¹¹Meenei Dimaadua, aago ina au gi au mee ala e hiihai bolo au gi heia. Dagia au i hongo di ala huudonu, idimaa, ogu hagadaumee le e dogologo.

¹²Goe hudee diagia au gi ogu hagadaumee ala e heebagi mai gi di au i nadau helekai hagamadagudagu mono helekai tilikai.

¹³Gei deeai, au e iloo bolo au e mouli hua bolo gii mmada au gi di humalia o Dimaadua i lodo dogu mouli nei.

¹⁴Hagadagadagagee gi Dimaadua! Hagadonu, hudee manawa bagege! Hagadagadagagee gi Dimaadua!