Pisalem 26:1-12

¹Meenei Dimaadua, haga iloo ina bolo au ogu huaidu ai, idimaa, au e hai nia mee ala e donu, gei e hagadagadagagee huoloo adu gi di Goe.

²Meenei Dimaadua, hagadina ina au mo di hagamada ina au. Hagiaga ina ogu hiihai mo ogu hagabaubau.

³Do manawa aloho dee modu dela e dagi au. Do manawa dahi dela e dagi au i nia madagoaa huogodoo.

⁴Au hagalee hagabuni gi digau ala balumee, gei au dagu mee e hai ang gi digau halahalau dangada ai.

⁵Au e hagadugina gi digau ala e haihai di huaidu, gei au hagalee noho i baahi digau huaidu.

⁶Meenei Dimaadua, au e tono ogu lima e hagamodongoohia bolo au ogu ihala ai, ge e hai agu daumaha e hana haganiga dau gowaa hai tigidaumaha.

⁷Au e daahili danggee, gei e hagi anga au hegau hagagoboina.

⁸Meenei Dimaadua, au e aloho i di hale dela e noho iei Goe, di gowaa dela e noho ai do madamada.

⁹Hudee daaligidia au madalia digau hai mee hala. Hudee daaligidia au be digau daaligi dangada gii mmade,

¹⁰nia daangada ala e hai mee huaidu i nia madagoaa huogodoo, ge e hagatogomaalia i nia madagoaa huogodoo e kae nia bahihadu haganeene.

¹¹Gei au, au e hai nia mee ala e donu. Dumaalia mai gi di au, haga dagaloaha ina au!

¹²Au gu benebene hagahumalia gi daha mo nia hagadilinga mee hagalliga huogodoo. Au e hagaamu Dimaadua i mua ana hagabuulinga daangada.