Pisalem 25:5-21

⁵Aago ina au dagu hai dela e mouli iei au gii hai be dau hiihai dela belee mouli iei au, idimaa, Goe go dogu God dela e haga dagaloaha au. Au e hagadagadagagee adu gi di Goe i nia laangi huogodoo.

⁶Meenei Dimaadua, gi langahia e Goe do dumaalia mo do manawa aloho dee modu dela ne hagamodongoohia aga Kooe i mua loo.

⁷Dumaalia mai gi di au i ogu huaidu mo agu mee hai hala ala ne hai i dogu madagoaa damagiigi. Gi langahia e Goe au, meenei Dimaadua, i lodo do manawa aloho deeodi mo o humalia huoloo.

⁸Idimaa Dimaadua le e donu gei e humalia, Mee e aago digau huaidu gi di ala dela belee hai gi daudali go digaula.

⁹Mee e dagi digau ala e hila gi lala gi di ala dela e donu, gei e aago digaula gi dono manawa.

¹⁰Mee e dagi digau huogodoo ala e daudali ana hagababa, mo di daudali ana helekai gi dono manawa dahi mo di aloho.

¹¹Meenei Dimaadua, haga gila ina aga au hagababa, dumaalia mai gi ogu huaidu, idimaa, ogu huaidu la gu logowaahee.

¹²Digau ala e hagalaamua Dimaadua ga iloo mai baahi o Mee di ala dela belee daudali go ginaadou.

¹³Digaula ga haadanga lamalia i nia madagoaa huogodoo, gei nia hagadili digaula ga hai mee gi tenua deelaa.

¹⁴Dimaadua le e hagadau ihoo gi digau ala e hagalongo ang gi de Ia, gei e haga mau dangihi ana hagababa ang gi digaula.

¹⁵Au e halahala dogu hagamaamaa gi baahi Dimaadua i nia madagoaa huogodoo, gei Mee e haga dagaloaha au gi daha mo di haingadaa.

¹⁶Meenei Dimaadua, huli mai gi di au mo di dumaalia mai gi di au, idimaa, au gu modogoau ge gu bagege.

¹⁷Hagamaamaa ina au i ogu de nnoomaalia, mo di haga dagaloaha ina au gi daha mo ogu haingadaa huogodoo.

¹⁸Goe hagamaanadu ina ogu haingadaa mo ogu duadua, gei gi dumaalia mai gi ogu huaidu huogodoo.

¹⁹Mmada gi di logo o ogu hagadaumee. Mmada gi tamanaiee o nadau hagadugina mai gi di au.

²⁰Hagaloohia au mo di benabena ina au. Hagaloohi au gi dee magedaa au. Au e hanadu gi di Goe gii noho au i di aumaalia.

²¹Ogu humalia mo ogu donu la gi hagaloohia au, idimaa, au dela e hagadagadagagee adu gi di Goe.