Pisalem 19:2-7

²Di laangi nei e haga iloo nia maa gi di laangi nomuli, gei di boo nei e taanga nia maa gi di boo nomuli.

³Deai nia helekai be nia leelee e hai ai, ge deai hogi di lee e hagalongo ginai ai.

⁴Gei nia helekai digaula guu dau loo i nia madagowaa huogodoo i henuailala. God guu hai dana gowaa i di langi belee noho ai di laa.

⁵Ma ga luada gei di laa e ulu mai gi daha gadoo be taane hai lodo ma ga ulu gi daha mo dono ruum, e hai gadoo labelaa be tangada lele di hoiaa e hiihai huoloo e lele di hoiaa.

⁶Mee e daamada i di mada o di langi e hana gi di mada dela i golo. Deai di mee e ngala i di welengina o maa ai.

⁷Nnaganoho o Dimaadua le e humalia huoloo, e hagamaaloo aga haga hoou nia manawa o nia daangada. Nia helekai a Dimaadua le e humalia e mee di hagadagadagagee ginai, e haga kabemee digau ala hagalee kabemee.