Pisalem 17:4-15

⁴be digau ala i golo. Au gu hagagila aga au haganoho, gei au hagalee heehee i di ala o digau ala e noho llamu dauwa.

⁵Au e heehee i hongo oo ala i nia madagoaa huogodoo, ge hagalee hana laa daha.

⁶Meenei God, au e dalodalo adu gi di Goe, idimaa Goe dela gu helekai mai. Malaa, huli mai gi di au mo di hagalongo mai gi agu helekai.

⁷Hagamodongoohia ina mai do aloho hagagoboina mo di haga dagaloaha ina au. Au gu benebene hagahumalia gi daha mo ogu hagadaumee i lala di malu o doo lima.

⁸Abaaba ina au gadoo be Goe ma ga abaaba o golomada. Hagammuni ina au gi lala di malu o bakau

⁹gi daha mo nia hai o digau huaidu. Nia hagadaumee daaligi dangada gii made e haganiga mai i dogu gili.

¹⁰Deai tumaalia i baahi digaula ai, gei digaula e helehelekai hagamuamua.

¹¹Digaula gu haganiga au dolomeenei, e gologolo au belee hudu gi lala, i dogu madagoaa ma gaa mmada gi daha.

¹²Digaula e hai gadoo be nia laion, e talitali au belee hahaahi hagaligiligi.

¹³Meenei Dimaadua, hanimoi! Hai baahi gi ogu hagadaumee, gei gi hagamagedaa ina digaula! Daawa ina au gi daha mo digau huaidu gi dau hulumanu dauwa.

¹⁴Haga dagaloaha ina au gi daha mo digau ala gu hai mee gi nia mee huogodoo ala e hiihai ginai ginaadou i henuailala. Daaligidia digaula gi taaligi dela gu haga togomaalia Kooe gi digaula. Heia nia dadaaligi gi dohu anga gi nadau dama, mo e wanga labelaa gi nia dama o nia dama digaula.

¹⁵Gei au ga mmada adu gi di Goe, idimaa au digi hai dagu mee hala. Dogu madagoaa ma ga ala aga, gei au ga tenetene, idimaa Goe dela i dogu baahi.