Pisalem 147:5-20

⁵Tadau Dagi le e aamua ge maaloo. Di kabemee o Maa le e deemee di hagatau.

⁶Mee e dahi aga digau ala e manawa hila gi lala, ge e dagadagahi digau huaidu gi lodo nia gelegele.

⁷Daahili i nia daahili hagaamu ang gi Dimaadua. Daahili i godou ‘harp’ ang gi tadau God.

⁸Mee e hagamodoho nia gololangi i lala di langi. Mee e hai nia uwa gii too gi henuailala, gaa hai nia geinga tolo gii tomo i tomo nia gonduu.

⁹Mee e wanga nia meegai gi nia manu, ga haangai nia manu mamaangi ‘raven’ i nadau madagoaa ma ga tangitangi hiigai.

¹⁰Mee hagalee manawa tene gi nia hoodo maaloo, be gi nia daane dauwa de mmaadagu.

¹¹Mee e manawa tene hua gi digau ala e hagalaamua Ia, mo digau ala e hagadagadagagee gi dono aloho dee modu.

¹²Jerusalem, hagaamuina Dimaadua! Zion, hagaamu ina doo God!

¹³Mee e hagaloohi haga humalia nia ngudu nia bontai o dau abaaba. Mee e haga maluagina au daangada.

¹⁴Mee e madamada humalia tagageinga o do henua, ga haangai goodou gi nia palaawaa ala koia e humalia.

¹⁵Mee ga helekai gi henuailala, gei di mee a Maa dela ne helekai ai le e gila hagalimalima.

¹⁶Mee e holo nia ‘snow’ gadoo be di ‘blanket’, ga haga nonnono nia magalillili gadoo be nia gelegele.

¹⁷Mee e haga doo dana uwa hadu magalillili gadoo be nia giligili. Deai tangada e mee di noho mahana i lodo di magalillili ma ga hai mai go Mee ai!

¹⁸Mee e helekai hua gei nia koolii gu waiwai. Mee gaa hai di madangi gii gono, gei nia wai ga malingi.

¹⁹Mee e wanga ana helekai gi ana daangada, ana aago mo ana haganoho gi digau Israel.

²⁰Mee digi hai di mee deenei gi digau o nia henua ala i golo, digaula e de iloo ginaadou ana haganoho. Hagaamu ina Dimaadua!