Pisalem 145:4-15

⁴Nia daangada ga haga modongoohia au mee huogodoo ala ne hai ang gi di adu dangada nomuli, gei digaula ga hagaamu o mogobuna. Digaula ga hagadele di hai o au hegau mogobuna.

⁵Digaula ga helehelekai i di hai o do madamada mo do aamua dee odi. Gei au ga hagabaubau huoloo i o hangaahai haga goboina huoloo.

⁶Nia daangada huogodoo ga helehelekai i di hai o nia mee huogodoo ala ne hai gi o mogobuna, gei au ga hagadele di hai o do maaloo aamua.

⁷Digaula ga helehelekai i do humalia, gei e dadaahili i di hai o do dumaalia.

⁸Dimaadua le e koia e aloho huoloo gei e dumaalia, e hagalee hagawelewele ngoohia, gei e honu i di aloho dee odi.

⁹Mee e humalia ang gi nia daangada huogodoo, gei e manawa dumaalia gi ana mee huogodoo ala ne hai.

¹⁰Meenei Dimaadua, au mee huogodoo ala ne hai Kooe ga hagaamu Goe, gei au daangada huogodoo ga danggee adu gi di Goe.

¹¹Digaula ga helehelekai i di mahi madamada oo dagi dau golohenua, mo di hai o mogobuna,

¹²bolo gi iloo ai nia daangada huogodoo di hai o mogobuna, mo di hai o nia mahi madamada o do henua.

¹³Di hai o di dagi dau golohenua la dono hagaodi ai, gei Goe e king gaa hana hua beelaa. Dimaadua le e manawa dahi hua gi ana hagababa, gei e dumaalia i ana hangahaihai huogodoo.

¹⁴Gei mee e hagamaamaa digau huogodoo ala guu noho i lodo di haingadaa, gei e dahi aga digau huogodoo ala guu too gi lala.

¹⁵Digau ala e mouli huogodoo, ginaadou e mmada adu mo di hagadagadagagee adu gi di Goe, gei Goe e haangai digaula gii hai be nadau hiihai.