22Na kahin Harin Agripa to, “Id kopi-i ku nod korinog inin minuvu.” Id tavak si Gubernador Festo nid ungketen to, “Oyya, simag od korinog du sikandin.”
23So-op no allow, id inguma onsi Harin Agripa woy si Bernice diyon to hukumanan. To kod-usok dan, id pokitakita ran iddos bantug dan amoy'd doongon to mgo minuvu. Woy id duma kandan iddos mgo kopitan to sundau woy dos mgo minuvu no novantug to iddon bonuwa. Na, id pa-angoy ni Gubernador Festo si Pablo.