Pesalem 94:3-20

³Secwaga tetoc tauŋ sa ma ôliŋ kêpi kêtu nêŋ secŋa e êndêŋ ondocgeŋ.

⁴Êsêac sêsôm biŋ alôb-alôb e aweŋôpic mêŋgêbôc laŋgwageŋ. Secwaga samob sêkêli tauŋ ŋanô.

⁵O Apômtau, êsêac sêka nêm lau popoc. Êsêac sêkôniŋ nêm gêŋlênsêm tôŋ.

⁶Êsêac sêgiŋ awêtuc to mosêbu êndu ma sêjac lau jaba, taŋ sêmoa aêacma gamêŋ naŋ êndu.

⁷Êsêac sêsôm gebe “Anôtô oc êlic sapu. Jakobnê Anôtô kêpuc mata tôŋ aêac atom.”

⁸Amac lau meloc, taŋ amoa lau ŋalêlôm naŋ, nêm kauc êsa acgommaŋ. Ma amac lau gêbôc oc êndêŋ ondoc acgom, go ajala biŋ ŋam.

⁹Ŋac tau, taŋ kêkêŋ aêac taŋeŋsuŋ kêsap tôŋ naŋ, oc êŋô biŋ atom me. Ma ŋac tau, taŋ kêkêŋ aêac mateŋanô naŋ, oc êlic gamêŋ teŋ sapu me.

¹⁰Ŋac tau, taŋ gêwa ŋamalacnêŋ kauc sa to gêjam gôliŋ tenteŋlatu samob naŋ, oc êkêŋ ŋagêjô atom me.

¹¹Apômtau tec kêjala biŋ, taŋ ŋamalac taêŋ gêjam gêc nêŋ ŋalêlôm naŋ, e jakêkip sa, mago êsêac tauŋ têtôm aweŋjaô ŋaôma.

¹²O Apômtau, aê aoc êôc ŋac, taŋ aôm gôjam gôliŋ eŋ naŋ, to aoc êôc ŋac, taŋ aôm gôwa nêm biŋsu sa gêdêŋ eŋ naŋ.

¹³Aôm gobe ômbôc gêŋwapac auc êndêŋ eŋ, ôŋgôm ômoa e êndêŋ bêc, taŋ sêkwê sê gebe ŋac alôb-alôb êsêp êna naŋ.

¹⁴Apômtau oc êtiŋ nê lau su atom ma oc êwi nê gêŋlênsêm siŋ atom.

¹⁵Biŋgêdêŋ oc êwaka tau sa aŋga gamêŋ mêtôcŋa êtiam ma lau gêdêŋ oc sêpuc biŋgêdêŋ tau tôŋ.

¹⁶Asa oc êpuc aê tôŋ êndêŋ lau secwaga. Asa oc êkô êwiŋ aê êndêŋ lau alôb-alôb.

¹⁷Apômtau embe ênam aê sa atom, oc ŋoc katuc wanêcgeŋ naêmoa nê gamêŋ ŋaŋêŋ su.

¹⁸Gêdêŋ taŋ katêc tauc gebe janac tauc êndu naŋ, nêm têmtac gêwiŋ teŋgeŋŋa kêpuc aê tôŋ, o Apômtau.

¹⁹Gêdêŋ taŋ gêŋwapac gêjam ŋoc ŋalêlôm auc naŋ, aôm gôjam malô aê e gôgôm aê têtac ŋajam kêsa kêtiam.

²⁰Lau sêmêtôc biŋ kesowaga to êsêac, taŋ sêjam biŋsu ŋamata ôkwi-ôkwi naŋ, oc sêwê kaiŋ aôm me.