Pesalem 81:1-12

¹Awem êôc Anôtô, taŋ kêtu aêacnêŋ gêjam-sawaga naŋ toôndugeŋ. Awem êôc Jakobnê Anôtô toôndugeŋ.

²Apuc wê sa ma anac oŋ êtaŋ ma aŋgôm gêŋ wêŋa tokaiŋ-tokaiŋ êtaŋ.

³Anac dauc êtaŋ êndêŋ ajôŋ mêŋêô lasê ma embe ajôŋ êtu samuc naŋ, anac ataŋ êtu nêm om ŋawaeŋa,

⁴gebe Israelnêŋ mêtê amboac tonaŋ. Jakobnê Anôtô kêjatu nê biŋ amboac tonaŋ.

⁵Kêkêŋ kêtu biŋsu gedeŋ Josep gêdêŋ taŋ gebe enseŋ Aiguptu naŋ. Aê gaŋô biŋ samuc teŋ, naŋ taŋocsuŋ gêjac kwanaŋgeŋ atom naŋ gebe

⁶“Aê kajoŋ gêŋwapac su aŋga aôm magim ma kakêŋ aôm gôwi nêm gadob kômŋa siŋ.

⁷Gêdêŋ taŋ kôtap gêŋwapac sa naŋ, awam gêjac aê ma gajam aôm sa. Aŋga ŋoc gamêŋ kêjaŋgaŋ, taŋ kasiŋ tau gamoa naŋ, aê kakêŋ taŋoc aôm. Aŋga bu sêli aweŋ saŋa Meriba aê kasaê aôm.

⁸Ŋoc lauac, akêŋ taŋem gabe jalêŋ biŋ amac. O Israel, taŋam wamu aêmamaŋ.

⁹Ônam sakiŋ anôtô jaba teŋ atomanô. Ma aôm oteŋ mec êndêŋ tenteŋlatunêŋ anôtôi teŋ atom.

¹⁰Aê Apômtau, tec katu nêm Anôtô, taŋ gawê aôm aŋga gamêŋ Aiguptu naŋ. Ôŋa awamsuŋ kacgeŋ gebe jalôm aôm.

¹¹“Mago ŋoc lau sêkêŋ taŋeŋ aê atom ma Israel sêgôm aêŋoc biŋ kêtu tôŋ atom.

¹²Tec gawi êsêac siŋ kêtu gêsuŋtêkwa ŋatoŋŋa sêsa nêŋ lêŋ kêtôm êsêac tauŋ nêŋ ŋalêlôm.