Pesalem 7:2-14

²Embe masi, go ŋacjo sêmôniŋ aê êŋgic to sênsaic aê amboac lewe gebe ŋoc ŋac-ênam-aê-sawaga masi.

³O Apômtau, ŋoc Anôtô, aê embe jaŋgôm gêŋ keso teŋ êndêŋ ŋac teŋ,

⁴ma embe jatu kasec ŋac, taŋ jagêc amoa tobiŋmalôgeŋ tauŋ naŋ, ma embe janam êsêac, taŋ sêkêŋ kisa aê ŋaôma naŋ, sa atom,

⁵go ŋacjo êjanda aê e naê aê tôŋ ma êka aê tôŋ tamiŋ nom to êŋgôm aê waec êtu meloc.

⁶O Apômtau, ôndi totêmtac ŋandaŋgeŋ ma ôndi sa mêŋonseŋ lau, taŋ sêlêsu aê naŋ, nêŋ ŋaôndu su. Aôm taŋ kômêtôc biŋ naŋ, matam jali êsa gebe ômoasiŋ aê.

⁷Ôkac tenteŋlatu samob sa wactetoc aôm sa acgom, gocgo wêc ômu ôpi ôwac nêm lôlôc êtiam.

⁸Apômtau kêmêtôc lau samob nêŋ biŋ. O Apômtau, ômêtôc ŋoc biŋ êtôm nêm biŋgêdêŋ ma ômoasiŋ aê êtu ŋoc biŋ masiŋa.

⁹Ôkêŋ lau, taŋ sêkac tauŋ su aŋga aômnêm naŋ, nêŋ biŋ alôb-alôb ênac pep, ma ôpuc ŋac gêdêŋ tôŋ êkô ŋajaŋa. O Anôtô gêdêŋ, aôm kôjala ŋoc ŋalêlôm e gôbi lêtêŋ.

¹⁰Anôtô kêkam aêŋoc lautuc ŋagabiŋ. Eŋ gêjam lau, taŋ taêŋ gêjam biŋgêdêŋ naŋ sa.

¹¹Anôtô kêmêtôc biŋ jagêdêŋ ma Anôtô tonaŋ kêkêŋ ŋagêjô kêtôm bêcgeŋ.

¹²Ŋac teŋ embe ênam tau ôkwi atom, oc Apômtau êuc nê siŋ ŋamata êsa êtu eŋŋa. Eŋ êkêkam nê sôb êkanôŋ eŋ.

¹³Eŋ êkêŋ nê sôb-enseŋ-lauŋa nadiŋgeŋ eŋ to ênam jalana tamiŋ nê sôb.

¹⁴Alicgac me, biŋ alôb-alôb gêjam ŋac sec auc. Eŋ taê gêŋ wapacŋa. Ma embe êkôc, oc talic gêŋ tau gebe biŋdansaŋ.