Pesalem 73:5-14

⁵Êsêac sêôc gêŋwapac têtôm lau ŋagêdô atom. Ma sêlic ŋandaŋ teŋ têtôm lau ŋagêdô atom.

⁶Amboac tonaŋ tec tetoc tauŋ sa kêtu nêŋ gêlôŋ, taŋ sênôŋ naŋ, ma ŋaclai kêkwa êsêac auc amboac nêŋ ŋakwê.

⁷Êsêac tonaŋ têtôp e mateŋanô kololoc gêja ma sêsêwa biŋ meloc, taŋ taêŋ gêjam gêc nêŋ ŋalêlôm naŋ, kêsa awê.

⁸Êsêac sêsu biŋ susu tonêŋ ŋalêlôm ŋamalic. Êsêac tetoc tauŋ sa ma sêpô biŋ kêpi laugeŋ.

⁹Aweŋsuŋ kêsôm biŋ geseŋ undambê ma imbeleŋ kêsôm biŋ gêjac laoc nomgeŋ.

¹⁰Amboac tonaŋ tec lau dêdêŋ êsêac ma sêlib êsêacnêŋ biŋ kêtôm sêlib bu.

¹¹Êsêac sêsôm gebe “Anôtô oc êjala biŋ amboac ondoc ma Lôlôc Ŋatau oc êŋô biŋ ŋam amboac ondocgeŋ.”

¹²Alic acgom, lau alôb-alôb nêŋ biŋ amboac tonaŋ sêmoa ŋajam gedeŋ tôŋgeŋ sêjac nêŋ awa sa-sa.

¹³Ojae, kamasaŋ ŋoc ŋalêlôm e ŋatipsawa ŋaômagoc ma kakwasiŋ lemoc e gawê geo teŋ ŋakaiŋ atom.

¹⁴Mago gêŋwapac gêgôm aê kêtôm bêcgeŋ ma gêŋ kêlêsu aê kêtôm ŋageleŋ samob.