Pesalem 71:10-23

¹⁰Gebe ŋoc ŋacjo sêsôm biŋ kêpi aê ma êsêac, taŋ sêkic ŋoc biŋ naŋ, sêjam biŋgalôm sêwiŋ tauŋ

¹¹ma sêsôm gebe “Anôtô gêwi eŋ siŋgac, ajanda eŋ e naakam eŋ tôŋ gebe ênê kêsiwaga masi.”

¹²O Anôtô, ômoa jaêc aê atom. O ŋoc Anôtô, ôlêtigeŋ mêŋônam aê sa.

¹³Êsêac taŋ sêkêŋ kisa aê naŋ, majeŋ êsa e sênaŋa ma sêsu êsêac, taŋ sebe sêkêŋ aê jandac gêŋwapac naŋ, susu e sêmoa toteŋbeleŋ ŋawapacgeŋ.

¹⁴Aê gabe jakêŋ matoc aôm endeŋ tôŋgeŋ ma jaŋgôm waem êsa êlêlêc su.

¹⁵Aocsuŋ êsôm nêm biŋgêdêŋ to nêm ŋaclai ônam ŋamalac saŋa lasê êtôm bêcgeŋ. Aê oc jasa moasiŋ tonaŋ sa êtôm atom.

¹⁶Aê gabe jasa Apômtau Anôtô nê gêŋ ŋaclai sa. Aê gabe jalambiŋ aôm taômgeŋ nêm biŋgêdêŋ.

¹⁷O Anôtô, aê ŋapalêgeŋ ma aôm kôdôŋ aê, tec gaoc nêm gêŋtalô lasê ŋapaŋ e gêdêŋ galoc.

¹⁸O Anôtô, embe jatu ŋamalacanô e môdê ênam aê auc, naŋ ôwi aê siŋ atom. Gebe jasôm nêm ŋaclai êndêŋ lau wakuc, taŋ mêŋsêsa êtu ŋamu naŋ.

¹⁹O Anôtô, nêm ŋaclai to biŋgêdêŋ kêsuŋ kwandaŋ kêpi e jagêdêŋ undambê. O Anôtô, taŋ gôgôm gêŋ ŋaclaisêga naŋ, asa oc êtôm aôm.

²⁰Aôm kôkêŋ gêŋwapac to gêŋ ŋandaŋ gêjam aê auc elêmê. Mago aôm oc ôkêŋ aê tekoc saki êsa êtiam ma ôwê aê sa aŋga nom ŋalêlômsêga japi jamêŋ êtiam.

²¹Aôm oc otoc aê sa êlêlêc ma ônac aê têtac tôŋ.

²²O ŋoc Anôtô, amboac tonaŋ oc aoc êôc aôm ŋa gêŋ wêŋa kêtu aôm ŋac ŋaŋêŋŋa. O Israelnêŋ ŋac dabuŋ, aê gabe jaŋgôm gêŋ wêŋa êtaŋ êndêŋ aôm.

²³Aê gêdôcôlic ênam lasê êtu têtac ŋajamŋa ma katuc, taŋ gôjam kêsi naŋ, amboac tonaŋgeŋ.