Pesalem 69:5-34

⁵O Apômtau, aôm kôjala ŋoc keso ma ŋoc geo kêsiŋ tau gêdêŋ aôm atom.

⁶O Anôtô, taŋ kôtu lausiŋ undambêŋa nêŋ ŋatau naŋ, ôkêŋ aê gebe jaŋgôm lau, taŋ mateŋ gê aôm naŋ, majeŋ êsa atom. O Israelnêŋ Anôtô, ôkêŋ aê gabe jaŋgôm lau, taŋ sêsap aôm tôŋ naŋ, waeŋ sec atom,

⁷gebe aê gaôc gêŋwapac sec kêtu aôm ŋa. Majoc e tecbeloc ŋawapac kêsa kêtu aômŋa.

⁸Ŋoc lasitêwai sêlic aê amboac ŋac jaba ma tinocnê lau sêlic aê amboac ŋac gamêŋbômŋa teŋ.

⁹Gebe gaim tauc su nêm anduŋa e katu meloc su. Ma lau, taŋ sêmbu aômŋa naŋ, nêŋ biŋ sêmbuŋa mêŋkêpi aê gêwiŋ.

¹⁰Aê katu kasec ôlic gebe kataŋ to gajam dabuŋ mo, mago lau sêsu aê susu.

¹¹Aê ganôŋ kaukauc kêtu ŋoc ŋakwê ma êsêac sêga wê susuŋa kêpi aê.

¹²Lau embe sêŋgôŋ malacluŋ naŋ, oc sênam aêŋoc biŋ êtu biŋgalôm ma lau, taŋ bu kêjaŋiŋ êsêac naŋ, sêga wê sec kêpi aê.

¹³O Apomtau, aê tec jansuŋ ŋoc mec êndêŋ aôm. O Anôtô, ôjô ŋoc mec êndêŋ noc, taŋ aôm gôlic ŋajam naŋ. Ôjô aê aoc êtu nêm têmtac gêwiŋ teŋgeŋŋa, êtu ôŋgôm nêm biŋ, taŋ gôjac mata naŋ, ŋanô êsa.

¹⁴Ôkam aê sa aŋga lemoŋ gebe gôdubub jasêp e najanaŋa atom. Ônam aê sa aŋga ŋoc ŋacjo nêŋ, ma aŋga bu ŋagêdim êwiŋ.

¹⁵Ôkêŋ ŋasamac ênsalê aê auc atom. Ma ôkêŋ aê janôm bu su jasêp gêdimbob me janêc êsêp sê jana atom.

¹⁶O Apômtau, ôkêŋ taŋam aê gebe nêm têmtac gêwiŋ teŋgeŋŋa tau ŋajam. Ôkac taôm ôkwi êndêŋ aê êtu nêm taêm labu ŋanôŋa.

¹⁷Ôsiŋ laŋôm ôkwi êndêŋ nêm sakiŋwaga atom. Aê gamoa jageo, ôjô aêŋoc biŋ galocgeŋ.

¹⁸Ôndêŋ aê ômôêŋ ma ônam aê kêsi. Ôsa aê laŋôc sa êndêŋ ŋoc ŋacjo.

¹⁹Aôm gôlic aêŋoc biŋ, taŋ sêgôm aê êndu-êndugeŋ to gaŋgôŋ jageo ma sêgôm aê katu meloc naŋgac. Aôm kôjala ŋoc soŋo-soŋo samobgac.

²⁰Sêsu aê susu e katuc gêbac to popocgeŋ, tec gamoa jageo ŋanô. Kasaê gebe sê malô aê elêmê ma kakêŋ matoc gebe sênam aê sa e masi.

²¹Êsêac sêkêŋ ŋaikisi aê gaeŋ kêtu mo ma gêdêŋ taŋ bu gêjô aê naŋ, sêkêŋ bu ŋamakic gêdêŋ aê ganôm.

²²Nêm moasiŋ êtu nêŋ lakô ma nêŋ moasiŋ daŋa êtu naŋ sê sêu tauŋ êsêpŋa.

²³Ôkêŋ êsêac mateŋanô êtu kanuc sêlic gamêŋ atom ma ôkêŋ êsêac magiŋ êsu.

²⁴Ôkêc nêm têmtac ŋandaŋ êpi êsêac ma nêm ŋalêlôm ŋamondec-mondec êtap êsêac sa.

²⁵Nêŋ malac oc êtu gasaŋ ênêc ma nêŋ andulêlôm êtu tuc êkô.

²⁶Gebe êsêac sêjanda ŋac, taŋ aôm taôm gôjac eŋ naŋ, ma sêjam biŋgalôm kêpi lau, taŋ aôm gôjac êsêac ôliŋ lasê naŋ, naŋ ŋandaŋ.

²⁷Ônsalê nêŋ keso ŋagêjô ênsac nêŋ keso ŋagêdô ŋaô. Ma ôkêŋ êsêac sêwê kaiŋ nêm moasiŋ ônam ŋamalac kêsiŋa atom.

²⁸Nêŋ ŋaê ênêc êwiŋ lau gêdêŋ nêŋ atom. Senseŋ êsêacnêŋ ŋaê su aŋga buku mateŋ jaliŋa ŋalêlôm.

²⁹Aê tec gaŋgôŋ jageo ma gaôc gêŋwapac ŋanô. O Anôtô, ôsip aê sa ma ônam aê kêsi.

³⁰Aê gabe jaŋga wê jaŋgôm Anôtônê ŋaê ŋawae êsa. Janam daŋge to jatoc eŋ sa ŋanô.

³¹Jaŋgôm amboac tonaŋ ec Apômtau êlic ŋajam êlêlêc bôc kapoac, êlêlêc bulimakao kapoac to ŋajabo ma bôc, taŋ eŋkêku gêwa kêkôc naŋ su.

³²Lau taŋ sêôc gêŋ wapac naŋ, embe sêlic oc têntac ŋajam êsa. Amac taŋ asom Anôtô amoa naŋ, nêm ŋalêlôm eŋgeŋ amac sageŋ.

³³Gebe Apômtau kêkêŋ taŋa lau ŋalêlôm sawa ma kêliŋ nê lau, taŋ sêŋgôŋ kapoacwalô naŋ, siŋ atom.

³⁴Undambê to nom aweŋ êôc Anôtô. Gwêc tau to ŋagêŋ mateŋ jali samob, taŋ gêmoa ŋalêlôm naŋ, amboac tonaŋgeŋ.