Pesalem 56:3-13

³Gêdêŋ ŋasawa, taŋ ŋoc ŋalêlôm ŋagogo gamoa naŋ, aê taêc kêka aômgeŋ.

⁴Aê taêc kêka Anôtô ma katêc tauc atom. Aê kalambiŋ Anôtô kêtu biŋ, taŋ eŋ gêjac mata naŋ. Ŋamalac oc sêŋgôm asageŋ êndêŋ aê.

⁵Kêtôm bêc samobgeŋ ŋoc ŋacjo sêlênsôŋ aê. Êsêac taêŋ gêjam biŋ tageŋ tonec gebe sêkic aêŋoc biŋ.

⁶Êsêac sêkac tauŋ sa ma dêdib aêŋoc lêŋ semoa gebe taêŋ kêka sebe senseŋ aê su.

⁷O Anôtô, ôkeŋ ŋagêjô êndêŋ êsêac êtu nêŋ secŋa. Aôm têmtac ŋandaŋ ma ôku tenteŋlatu tulu.

⁸Aôm kôsa aêŋoc noc ŋawapacŋa sa. Aôm kôkêŋ aê matocsulu kêsêp nêm laclu jakêpoac. Aôm koto ŋoc bêc ŋawapacŋa kêsêp nêm bukugoc.

⁹Embe jamôêc êndêŋ Apômtau oc ŋoc ŋacjo sêc su. Aê kajala kêtu tôŋ gebe Anôtô ênam aê sa.

¹⁰Aê oc jalambiŋ Anôtô êtu nê biŋŋa. Aê kalambiŋ Apômtau kêtu biŋ, taŋ gêjac mata naŋ.

¹¹Aê taêc kêka Apômtau, tec katêc tauc atom. Ŋamalac têtôm gebe sêŋgôm asageŋ êndêŋ aê.

¹²O Anôtô, kôm tonec gêjac aê ŋawae gebe jaŋgôm biŋ, taŋ gajac mata gêdêŋ aôm naŋ, ŋanô êsa. Aê oc jansuŋ da daŋgeŋa êndêŋ aôm êwac.

¹³Gebe aôm gôjam aêŋoc katuc sa gebe jamac êndu atom ma gôjam ockaiŋ sa gebe jaka bêlêlib atom. Gebe jasêlêŋ jamoa Anôtô laŋônêmŋa ma jamoa ŋawê, taŋ kêpô lau mateŋ jali naŋ, ŋalêlôm jawiŋ. eŋ tôŋ aŋga malac Gat naŋ.