Pesalem 55:6-22

⁶Aê kasôm gebe “Ojae, balôsimagê ênêc aêmamaŋ gebe jalôp sa jaêc gêŋ tonec su najalêwaŋ tauc jamoa ŋoc ŋasawa teŋ.

⁷Oc jaêc baliŋgeŋ jana, jalêwaŋ tauc jaŋgôŋ ŋoc gamêŋ sawa tau.

⁸Oc jaêc jana ŋoc gamêŋ kêsiŋ teŋ gebe mu-gêbuc to gamêŋ-kêlaŋgaŋ ê aê tôŋ atom.”

⁹O Apômtau, onseŋ êsêac su ma ôwa êsêac nêŋ biŋ êŋgic gebe galic sêgôm gêŋ ŋaclai to sêkac tauŋ kêkôc aŋga malac.

¹⁰Êsêac sêgi malac kêtôm bêc to geleŋgeŋ sêsêlêŋ sêmoa ŋatuŋbôm ŋaô ma gêŋ keso to biŋwapac gêjam malac auc.

¹¹Ŋaclai sec gêjam gamêŋ auc. Ma sêkôniŋ lau to sêsau biŋdansaŋ aŋga malacluŋ.

¹²Ŋacjo embe êsu aê susu oc jaôc gêŋwapac tonaŋ. Embe ŋoc soŋo-soŋo êkiaŋ tau sa êndêŋ aê oc jasiŋ tauc ôkwi.

¹³Mago aôm, taŋ kôtôm aê naŋ, aôm ŋoc ŋac jabaŋ aê to ŋoc ŋac, ôlim andaŋ aêŋa gôgôm gêŋ tau.

¹⁴Aêagêcnêŋ biŋ gelom tau e ŋapep ma tawê toôndugeŋ dawiŋ tauŋ dadêŋ Anôtônê andu taja.

¹⁵Ojae, ŋoc ŋacjo sêmac sênaŋamaŋ ma sêsêp lamboam tomateŋ jaligeŋ sênamaŋ gebe biŋ alôb-alôb gêjam nêŋ andu to nêŋ ŋalêlôm auc.

¹⁶Aê tec gamôêc gêdêŋ Apômtau ma Apômtau oc ênam aê kêsi.

¹⁷Aê gabe jateŋ to janiŋ oliŋ tauc êndêŋ êtula ma eleŋŋa to ocsalô ma oc êkêŋ taŋa aê aoc.

¹⁸Eŋ oc ênam katuc kêsi gebe êmoa tomalô ec êsêac mêŋtêtu gasuc aê atom gebe êsêac, taŋ sebe senseŋ aê naŋ, taêsam ŋalêlêma atom.

¹⁹Anôtô taŋ gêŋgôŋ nê lêpôŋ gêdêŋ andaŋgeŋanô naŋ, oc êkêŋ taŋa aê ma êkôniŋ êsêac tôŋ. Êsêac têtêc Anôtô atom ma sênam tauŋ ôkwi atom amboac tonaŋgeŋ.

²⁰Aêŋoc ŋac, taŋ gêmuŋgeŋ ôli andaŋ aê naŋ, lêma kêpi tau nê lau. Eŋ gêjac nê poac popoc.

²¹Awasuŋ geŋ oso biŋ e ŋawasi kêtôm bôc ŋalêsi, mago biŋ tau ŋamata kêtôm siŋ. Eŋ kêbanac biŋ ŋajam-ŋajamgeŋ kêlêlêc niptêkwi su, mago kêtôm têdaiŋ siŋ gebe sênac.

²²Ôkac nêm gêŋwapac tolagic su êndêŋ Apômtau, eŋ oc ênam aôm sa. Eŋ oc êkêŋ ŋac gêdêŋ êku atomanô.