Pesalem 51:10-18

¹⁰O Anôtô, ôkêŋ ŋoc ŋalêlôm ŋawa êsa ma ôkêŋ ŋalau wakuc to ŋaŋêŋ teŋ êŋgôŋ ŋoc ŋalêlôm.

¹¹Ôtiŋ aê su aŋga laŋômnêm atom ma ôkôc nêm Ŋalau Dabuŋ su aŋga aê atom.

¹²Ôkêŋ nêm moasiŋ êŋgôm aê têtac ŋajam êsa êtiam ma ôpuc aê tôŋ ŋa ŋalau taŋoc wamuŋa.

¹³Go aê jandôŋ aômnêm biŋ êndêŋ lau, taŋ sêgêli aômnêm biŋ sêmoa naŋ, ma lau sec sênam tauŋ ôkwi dêndêŋ aôm sêmu sêwac êtiam.

¹⁴O Anôtô, ŋoc moasiŋ ŋaAnôtô, ônam aê sa gebe jamac êndu atom, go imbeloc êôc aôm sa toôndugeŋ gebe aôm ŋac gêdêŋ.

¹⁵O Apômtau, ondelec gêdôcôlic gebe aocsuŋ jasôm aôm waem lasê

¹⁶gebe da gêjac matamanô ŋajam atom ma embe jansuŋ daja êwac, aôm oc ôlic ŋajam atom.

¹⁷Da taŋ gêjac Anôtô mataanô ŋajam naŋ, katuŋ popoc. O Anôtô, laŋôm eo ŋalêlôm popoc to ôluŋ-ôluŋ atom.

¹⁸Moasiŋ ŋatau aôm, ômoasiŋ Siongeŋ. Ômboa tuŋbôm Jerusalemŋa sa êtiam.