Pesalem 48:2-13

²Ênê lôc dabuŋ gêguŋ sa laŋgwageŋ kêtu ŋamalac samob nêŋ gêŋ ênac mateŋanô ŋajamŋa. Anôtônê lôc tau tec lôc Sion kiŋ kapôêŋ nê malac.

³Anôtô kêwaka tau sa aŋga êsêacnêŋ andulêlôm gebe eŋ laimôkê.

⁴Gôlicgac me, kiŋ sêkac tauŋ sa ma êsêac sêwêgeŋ sêmêŋ,

⁵e sêlic ma têtakê. Êsêac selendec e nêŋ meloco kêsa ma sêc êliŋ-êliŋ

⁶ma têtênêp tauŋ êndu-êndu to sêmoa jageo amboac awê, taŋ ŋapalê kêtuŋ eŋ naŋ.

⁷Aôm kôkêŋ musalô kapôêŋ e gôjac lau Tarsis nêŋ waŋ popoc.

⁸Galoc talic gêŋ tau kêtôm, taŋ taŋô naŋ, aŋga lau siŋ undambêŋa nêŋ Apômtau nê malac, aŋga nêŋ Anôtô nê malac, taŋ eŋ kêwaka sa gebe êkô endeŋ tôŋgeŋ.

⁹O Anôtô, aêac taêŋ gêjam aômnêm têmtac gêwiŋ teŋgeŋŋa amoa nêm lôm dabuŋ ŋalêlôm.

¹⁰O Anôtô, aôm waem kêsa e jagêdêŋ nom ŋamadiŋ kêtôm nêm ŋaê. Biŋgêdêŋ kêsêp lêmam anôŋa e mêŋgêc poap tageŋ.

¹¹Lôc Sion êtu samuc êtu biŋ tonaŋŋa. Juda latuŋio sênam lasê toôndugeŋ êtu aôm kômêtôc biŋŋa.

¹²Asêlêŋ awê aŋgi lôc Sion auc ma asa ŋaandulatu tuŋbômŋa sa.

¹³Asala tuŋbôm tomalageŋ e êmbacnê ma asêlêŋ amoa ŋaandu towae ŋalêlôm, gebe anac miŋ êndêŋ lau wakuc sêŋô,