Pesalem 44:1-25

¹O Anôtô, aêac tauŋ aŋô kêsô taŋeŋsuŋ ma tameŋmai sêjac aômnêm miŋ gêdêŋ aêac gebe gêdêŋ êsêacnêŋ bec, taŋ sêmoa naŋ, aôm gôgôm nêm gêŋsêga gêdêŋ êsêac, gôgôm gêdêŋ bêc andaŋgeŋŋa.

²Aôm lêmam jagoseŋ lau samuc su ma kôkêŋ nêm lau sêŋgôŋ sêjô êsêac maleŋ. Aôm goseŋ tenteŋlatu su, ma kôlaiŋ êsêacgeŋ sêjam gamêŋ auc.

³Êsêac tauŋ nêŋ siŋ kêsi gamêŋ ŋatau su atom. Ma êsêac tauŋ nêŋ ŋaclai kêku ŋacjo tulu atom. Aôm taômgeŋ nêm anôŋa to lêmam ma laŋômanô ŋawê gêgôm gebe aôm têmtac gêwiŋ êsêac.

⁴Aôm taômgeŋ kôtu ŋoc kiŋ to Anôtô. Aôm kôkêŋ Jakob kêku nê ŋacjo tulu.

⁵Aôm ôwiŋ aêac, go akôniŋ ma ŋacjo tôŋ. Aômnêm ŋaê êpuc aêac tôŋ, go aka ma ŋacjo popoc.

⁶Aê kakêŋ gêwiŋ ŋoc talamgeŋ atom. Ma aêŋoc siŋ gêjam aê sa atom.

⁷Aôm taômgeŋ tec kôpuc aêac tôŋ gêdêŋ ma ŋacjo. Ma gôgôm êsêac, taŋ nêŋ ŋalêlôm kêmoatiŋ tôŋ kêtu aêacŋa naŋ, nêŋ meloco kêsa.

⁸Aêac atoc Anôtô sa gedeŋ tôŋgeŋ. Ma aweŋ gêôc nêm ŋaê ŋapaŋ.

⁹Mago galoc kôtiŋ aêac su to gôgôm aêac majeŋ kêsa ma gôwiŋ aêacma siŋwaga atom.

¹⁰Aôm kôpuc aêac tôŋ atom, tec aêac aêc kêtu ma ŋacjoŋa. Ma êsêac, taŋ nêŋ ŋalêlôm kêmoatiŋ tôŋ kêtu aêacŋa naŋ, sê ma waba êliŋ-êliŋ.

¹¹Aôm gôwi aêac siŋ ŋamelocŋageŋ amboac domba, taŋ sêwê gebe nasêmbuc naŋ. Aôm kôpa aêac êliŋ-êliŋ asêp lau samuc ŋalêlôm.

¹²Aôm kôkêŋ taôm nêm lau dêdêŋ lau sêjam ôli êsêac ma sêkêŋ ŋaôli sauŋanô amboac êsêac gêŋ ŋaôma teŋ.

¹³Aôm kôkêŋ lau, taŋ ma sackapoagêdô gêdêŋ tauŋ naŋ, têtaŋ pêlê aêac. Lau samob, taŋ sêgi aêac auc sêŋgôŋ naŋ, têtaŋ pêlê to sêômac aêac.

¹⁴Aôm kôkêŋ aêac atu lau samuc nêŋ biŋ makicŋa ma tenteŋlatu têdaiŋ gêsuŋ kêtu aêacŋa.

¹⁵Aê taêc gêjam ŋoc majoc gedeŋ tôŋgeŋ ma majoc kêkôm laŋôcanô auc.

¹⁶Gebe gaŋô biŋ pêlêŋa to biŋ alôb-alôb ma galic ŋacjo seŋ anô-anô gebe sêkac nêŋ kamocgôc.

¹⁷Aêac atap gêŋ tonaŋ ŋai samob sa, mago aliŋ aôm siŋ ma agôm aômnêm poac paliŋ atom.

¹⁸Aêacma ŋalêlôm kêkac tau su aŋga aômnêm atom. Ma aêac eŋkaiŋ geo gala aômnêm intêna atom.

¹⁹Mago aôm kôkêŋ kêam sec saleŋŋa sêŋac aêac popoc ma gêsuŋbôm gêjam aêac auc.

²⁰Aêac embe aliŋ ma Anôtô siŋ ma aôc lemeŋ sa êndêŋ anôtô jaba teŋ,

²¹eŋ oc êtap biŋ amboac tonaŋ sa atom me. Gebe eŋ tec kêjala gêŋ samob, taŋ aêac ajala gêc ma ŋalêlôm ŋadim labusêga teŋ naŋ.

²²Masigoc, sêjaiŋ aêac kêtôm bêcgeŋ kêtu aômŋa. Ma sêgôm aêac atôm bôc, taŋ sebe sêmbuc naŋ.

²³O Apômtau, matam êpoamaŋ. Gôêc bêc kêtu asageŋŋa. Matam êlac ma ômasuc aêac endeŋ tôŋgeŋ atom.

²⁴Gôsaŋ laŋômanô auc, o wageŋ. Ma kôliŋ aêacma gêŋwapac to aŋgôŋ jageoŋa siŋ.

²⁵Ojae, ma katuŋ kêpô gêduc e geŋ kekop laŋgwageŋ. Aêacma ôliŋ kêtap labôc jagêc.