Pesalem 40:1-10

¹Aê gaôŋ Apômtau to gajam aoc su eŋ, ma eŋ gewec mêŋkêkêŋ taŋa ŋoc taŋi.

²Eŋ gê aê sa aŋga gêsuŋ ŋakêlêndiŋ to aŋga lemoŋ ŋagôlub-gôlub. Eŋ kêkêŋ ockaiŋ kaka poc tôŋ ma kêpuc ockaiŋ tôŋ kasêlêŋ ŋajaŋa.

³Eŋ kêkêŋ wê wakuc kêsêp aocsuŋ. Kêdôŋ wê lambiŋŋa teŋ kêpi aêacnêŋ Anôtô. Lau taêsam sêlic e selendec e mateŋ êsap Apômtaugeŋ.

⁴Aoc êôc ŋac, taŋ mata kêsap Apômtau naŋ, ma gêmoa gêwiŋ teŋbeleŋ aŋgeŋwaga atom to kêsa dansaŋtêna nêŋ lêŋ atom.

⁵O ma Apômtau Anôtô, aôm gôgôm gêŋtalô taêsam kêtu aêacŋa. Ŋac teŋ kêtôm aôm gêmoa atom. Aôm taêm gêjam lêŋ moasiŋŋa taêsam amboac tonaŋ. Aê embe jawa sa to jasa sa, oc jatôm atom gebe taêsam ŋanô lasê.

⁶Da sêbucŋa to da keleŋ gêjac aôm matamanô ŋajam atom, mago kômasaŋ taŋocsuŋ gobe jaŋô biŋ. Aôm koteŋ daja to da wama atom.

⁷Amboac tonaŋ jasôm gebe “Ôlic acgom, oc jawac sêwa aêŋoc biŋ sa gêc biŋsu ŋabuku.

⁸O ŋoc Anôtô, aê jaŋgôm aômnêm biŋ êtu tôŋ janac ŋawae. Nêm biŋsu gêc ŋoc ŋalêlôm.”

⁹Aê kasôm aôm gôjam aêac sa ŋawae lasê aŋga lau taêsam sêkac tauŋ sa ŋalêlôm. O Apômtau, aôm taôm gôlicgac gebe aê kagamiŋ gêdôcôlic atom.

¹⁰Aê gasaŋ nêm biŋ gôjam lau kêsiŋa ŋawae auc gêc ŋoc ŋalêlôm atom. Kasôm lasêgeŋ gebe aôm ŋac ŋaŋêŋ to gôjam lau sa.