Pesalem 37:2-35

²Êsêac oc têtu gegoŋ sebeŋ amboac gêgwaŋ ma sêmêliŋ amboac gêgwaŋ ŋamêdôb.

³Ôkêŋ êwiŋ Apômtau, ec ôŋgôm gêŋ ŋajamgeŋ. Ôŋgôŋ nêm gamêŋ ma ôŋgôm gêŋ êndêŋgeŋ.

⁴Ôtu samuc Apômtau. Eŋ oc êkêŋ gêŋ, taŋ nêm ŋalêlôm taêm kêka naŋ.

⁵Ôsakiŋ nêm lêŋ êndêŋ Apômtau ma ôkêŋ êwiŋ eŋ, eŋ oc êŋgôm ŋajam êsa.

⁶Eŋ oc êkêŋ aômnêm biŋ gêdêŋ êpô gamêŋ amboac ŋawê. Ma aômnêm biŋ ŋaŋêŋ ŋawê amboac oc kêkô ŋaluŋ.

⁷Ônam taôm tôŋ ômoa Apômtau laŋônêm ma ôkêŋ matam eŋgeŋ. Ôniŋ oliŋ ŋac, taŋ kêtap nê kôm ŋanô sa ma ŋac, taŋ kêkic launêŋ biŋ ma gêgôm ŋanô kêsa naŋ atom.

⁸Ojop taôm êndêŋ têmtac ŋandaŋ ma ôkac taôm su aŋga ŋalêlôm kêmoatiŋ tôŋ. Ôniŋ oliŋ taôm atom, oc êkalem sec.

⁹Apômtau oc enseŋ lau-sêgôm-secwaga su. Ma êsêac, taŋ sêkêŋ mateŋ Apômtau naŋ, oc sêwê kaiŋ gamêŋ tau.

¹⁰Sauŋgeŋ acgom, go secwaga tau oc malamê ma embe onsom aŋga eŋ mala, oc ôtap eŋ sa atom

¹¹Mago lau wapac oc têtu gamêŋ ŋatau, ma moasiŋ oc ênam êsêac auc sêmoa nêŋ ŋajam.

¹²Secwaga kêkic ŋac gêdêŋ nê biŋ ma gêmôê luluŋ kêtu eŋŋa.

¹³Mago Apômtau kêômac eŋ gebe kêjala gebe sauŋgeŋ, go ŋac tau ênaŋa.

¹⁴Lau-secwaga sêkac nêŋ siŋ sa ma sêkêkam nêŋ talam, sebe senseŋ ŋac ŋasec to ŋalêlôm sawa ma sênac êsêac, taŋ sêsa nêŋ lêŋ gêdêŋgeŋ naŋ êndu.

¹⁵Mago acnêŋ siŋ oc êmbuc êsêac tauŋ nêŋ ŋalêlôm ma nêŋ talam oc tulu-tulugeŋ ênaŋa.

¹⁶Ŋac-gêdêŋ nê waba luagêcgeŋ embe ênêc, oc êlêlêc secwaga taêsam nêŋ waba ŋanô lasê su.

¹⁷Lau taŋ sêkac tauŋ su aŋga Anôtônê naŋ, nêŋ lemeŋ dambê oc tulu, mago Apômtau oc êpuc lau gêdêŋ tôŋ.

¹⁸Apômtau kêjala lau mansaŋ nêŋ bêc ma nêŋ gêŋlênsêm oc ênêc teŋgeŋ.

¹⁹Êndêŋ bêc gêŋwapacŋa oc sêpô lêna tauŋ atom. Êndêŋ bêc tôbômŋa, naŋ mo oc êôc êsêac tôŋ.

²⁰Lau taŋ sêkac tauŋ su aŋga Anôtônê naŋ, oc sêmbac sênaŋa. Ma Apômtaunê ŋacjo oc sênaŋa amboac ŋaola kêsêlô, ma sê su amboac jadauŋ.

²¹Ŋac sec nê gêŋ masi, tec oc ênac launêŋ tôp êtôm atom. Ma ŋac gêdêŋ oc êkêŋ gêŋ totêtac wapômgeŋ.

²²Lau taŋ Apômtau gêjam mec êsêac naŋ, oc sêwê kaiŋ gamêŋ êtu nêŋ gêŋ. Ma lau, taŋ eŋ kêpuc boa êsêac naŋ, oc sênaŋa.

²³Apômtau gêjam gôliŋ launêŋ lêŋ ma kêpuc ŋac, taŋ nê lêŋ gêjac eŋ mataanô ŋajam naŋ tôŋ.

²⁴Eŋ embe embeŋ, oc gacgeŋ êsêp naênêc atom gebe Apômtau kêkam eŋ gêdêŋ lêma.

²⁵Aê ŋapalêgeŋ e katu ŋac laŋgwa, mago galic Apômtau gêwi ŋac gêdêŋ teŋ siŋ atomanô. Ma galic nê gôlôac têtaŋ gêŋ teŋ atomanô.

²⁶Eŋ ŋac têtac wapôm ma êkêŋ gêŋ êndêŋ lau, taŋ teteŋ eŋ naŋ. Ma nê gôlôac oc têtu moasiŋ laugeŋ.

²⁷Ôŋgamiŋ taôm êndêŋ sec ma ôŋgôm gêŋ ŋajamgeŋ, go ômoa nêm gamêŋ teŋgeŋ

²⁸Gebe Apômtau têtac gêwiŋ biŋ gêdêŋ ma oc êwi nê lau mansaŋ siŋ atom. Eŋ oc ejop nê lau gêdêŋ sêmoa teŋgeŋ, mago lau alôb-alôb nêŋ wakuc oc maleŋmê.

²⁹Lau gêdêŋ oc têtu gamêŋ ŋatau ma oc sêŋgôŋ nêŋ gamêŋ tau endeŋ tôŋgeŋ.

³⁰Ŋac gêdêŋ nê awasuŋ kêsôm biŋ tokauc lasê ma imbêla kêsôm biŋ jagêdêŋ.

³¹Ŋac tau nê Anôtônê biŋsu gêc ênê ŋalêlôm, tec kêsêlêŋ kêku kêpac atom.

³²Ŋac keso gêdib ŋac gêdêŋ ma taê gêjam gebe enseŋ eŋ su ênaŋa.

³³Mago Apômtau kêkô ŋac gêdêŋ auc ma embe êmêtôc ênê biŋ, oc êkêŋ eŋ lêwaŋ-lêwaŋ atom.

³⁴Ôkêŋ matam Apômtaugeŋ to ôsap ênê lêŋ tôŋ, go etoc aôm sa ôtu gamêŋ ŋatau ma aôm ôlic eŋ enseŋ lau sec su.

³⁵Aê galic ŋac sec teŋ, taŋ ketoc tau sa ŋanôgeŋ e keleŋ gamêŋ su amboac kaseda Lebanonŋa.