Pesalem 34:2-21

²Ŋoc katuc etoc tau sa êtu Apômtau ŋa. Êsêac, taŋ sêôc gêŋwapac naŋ, sêŋô e têntac ŋajam êsa.

³Anam Apômtaunê wae êsa awiŋ aê. Ma tatoc ênê ŋaê sa seleŋgeŋ.

⁴Aê gamôêc Apômtau ma eŋ kêkêŋ taŋa aê. Ma kêjaŋgo aê su aŋga gêŋ samob, taŋ katêc naŋ.

⁵Matam ê Apômtau, go têmtac ŋajam êsa ma asa tembelam sa ŋapaŋ.

⁶Ŋac ŋalêlôm sawa tonec gêmôêc e Apômtau kêkêŋ taŋa eŋ ma gêjam eŋ sa aŋga nê gêŋwapac samob.

⁷Apômtaunê aŋela kêpiŋ êsêac, taŋ têtêc eŋ naŋ auc ma gêjam êsêac sa.

⁸Ansaê ênac awem to ajala gebe Apômtau eŋ ŋac gabêjam ŋanô. Aweŋ êôc samob, taŋ sê lamu eŋ naŋ.

⁹Amac taŋ atu Apômtaunê lau dabuŋ naŋ, atêc eŋgeŋ. Gebe êsêac, taŋ têtêc eŋ naŋ, oc sêpô lêna gêŋ teŋ atom.

¹⁰Lewe ŋalatu tauŋ oc sêpô lêna ma mo oc êjô êsêac, mago êsêac, taŋ sensom Apômtau naŋ, oc seso gêŋ ŋajam teŋ atom.

¹¹O ŋapalêac, amêŋ akêŋ taŋem aêmaŋ. Aê gabe jandôŋ amac êtu atêc Apômtau ŋa.

¹²Asa taê gêjam gebe êŋgôŋ mata jali ŋêŋgeŋ ma taê kêka gebe nê bêc ênac têku tau ma êtap ŋajam sa.

¹³Ojop imbêlam êndêŋ biŋ sec to gêdômôlic êndêŋ biŋdansaŋ.

¹⁴Ônac jaê sec ma ôŋgôm gêŋ ŋajam. Onsom biŋ malô ma ôlêtigeŋ e naôê tôŋ.

¹⁵Apômtau mata kêsap lau gêdêŋ ma kêkêŋ taŋa nêŋ taŋiboa.

¹⁶Apômtaunê laŋôanô kêkô secwaga auc gebe enseŋ êsêac su e nêŋ lau taêŋ ênam êsêac êtiam atom.

¹⁷Lau gêdêŋ embe sêmôêc, go Apômtau oc êkêŋ taŋa ma ênam êsêac sa aŋga nêŋ gêŋwapac samob.

¹⁸Apômtau gêjam tamiŋ lau-ŋalêlôm-popocwaga. Eŋ gêjam êsêac, taŋ nêŋ katuŋ ôluŋ-ôluŋgeŋ naŋ sa.

¹⁹Ŋac gêdêŋ gêôc gêŋwapac taêsam, mago Apômtau gêjam eŋ sa gêdêŋ gêŋ tonaŋ ŋai samob.

²⁰Eŋ gejob ênê ŋatêkwa samob gebe ŋateŋ tulu atom.

²¹Sec oc ênac ŋac sec êndu. Ma êsêac, taŋ têntac sec êndêŋ ŋac gêdêŋ naŋ, oc têtap ŋagêjô sa.