Pesalem 33:5-19

⁵Eŋ têtac gêwiŋ biŋ gêdêŋ to biŋ ŋaŋêŋ. Apômtaunê têtac gêwiŋ teŋgeŋŋa gêjam nom samuc auc.

⁶Undambê ŋanô kêsa ŋa Apômtaunê biŋ. Ma ŋagêlôŋ samob tonaŋ ŋanô kêsa ŋa ênê awajaô.

⁷Eŋ gêjac gwêc sa kêpi tageŋ amboac kêsêp bulakôp. Eŋ kêkêŋ gwec ŋagêdimbob kêpoac ŋalapsamboam.

⁸Nom samuc têtêc Apômtau ma ŋamalac samob, taŋ sêŋgôŋ nom naŋ, sêuc labu eŋgeŋ.

⁹Gebe eŋ kêsôm ma gêŋ ŋanô kêsa. Eŋ kêjatu ma gêŋ tau jakêkô.

¹⁰Apômtau geseŋ tenteŋlatunêŋ poac e ŋanô masi. Eŋ kêkô biŋ, taŋ lau samuc sêmasaŋ naŋ auc.

¹¹Apômtaunê poac ênêc endeŋ tôŋgeŋ. Biŋ taŋ eŋ kêmasaŋ gêc nê ŋalêlôm naŋ, oc elom gôlôac to gôlôac.

¹²Aweŋ êôc lau, taŋ Apômtau kêtu nêŋ Apômtau naŋ, lau tau, taŋ eŋ kêjaliŋ sa gebe têtu ênê gêŋlênsêm naŋ.

¹³Apômtau kêtuc kêniŋ aŋga undambê kêsêp gêmêŋ. Eŋ mataanô kêpi ŋamalacnêŋ latuŋi samob.

¹⁴Ŋac tau gêŋgôŋ nê lêpôŋ ma mata gêdiŋ ŋamalac samob, taŋ sêŋgôŋ nom naŋ.

¹⁵Ŋac tau tonaŋ tec kêmasaŋ samob nêŋ ŋalêlôm. Ŋac tau tonaŋ tec mata gêdiŋ gêŋ samob, taŋ êsêac sêgôm naŋ.

¹⁶Siŋwaga taêsam ŋasec, mago oc sênam nêŋ kiŋ sa atom. Ma siŋsêlêc ŋaclai oc êku ŋacjo tulu atom.

¹⁷Teŋ embe taê êka nê hos siŋŋa gebe êku ŋacjo tulu, oc ênsau tau, gebe nê hosnê ŋaclai tau oc ênam eŋ sa atom.

¹⁸Alic acgom, Apômtau mata gê êsêac, taŋ têtêc eŋ naŋ, to êsêac, taŋ sêkêŋ mateŋ ênê têtac gêwiŋ teŋgeŋŋa naŋ,

¹⁹gebe ênam êsêac katuŋ sa êtu sêmac êndu atomŋa to êôc êsêac, taŋ sêmoa mateŋ jali naŋ, tôŋ êndêŋ noc tôbômŋa.