Pesalem 31:6-19

⁶Aôm têmtac gedec êsêac, taŋ sêsap gwam ŋaôma tôŋ naŋ samucgeŋ, mago aê matoc kêsap Apômtau tôŋ.

⁷Aê oc têtac ŋajam ma ôlic êpigeŋ êtu nêm têmtac gêwiŋ teŋgeŋŋa gebe aôm matam gê aê gêdêŋ gaŋgôŋ jageoŋa ma kôjala ŋoc katuc ôluŋ-ôluŋ ŋam.

⁸Aôm gôwi aê siŋ kêsêp ŋacjonê lêma atom. Aôm kôkêŋ aê ockaiŋ kaka gamêŋ ŋatapa tôŋ.

⁹O Apômtau, taêm walô aê gebe gaŋgôŋ jageo. Gêŋwapac gêgôm aê matocanô ŋatalô kêsa e katuc to ôlic kêlênim tau.

¹⁰Ŋoc têm gamoa matoc jaliŋa samob kêtu gêŋwapacŋageŋ gêja ma kataŋ taŋiboa kêtôm ŋoc jala samob. Aê tekoc gêbac kêtu gamoa jageoŋa ma ŋoc ŋatêkwa kêtu goloŋ su.

¹¹Ŋoc ŋacjo samob têtaŋ pêlê aê ma ŋoc lau, taŋ sackapoagêdô gêdêŋ tauŋ naŋ, sêsu sam su aê. Ŋoc sêlêb embe sêlic aê, oc têtêc aê. Lau teŋ embe têtap aê sa aŋga intêna, oc sêc aê.

¹²Êsêac sêliŋ aê siŋ amboac ŋac, taŋ gêmac êndu su naŋ. Aê katôm ku ŋamoasagac.

¹³Lau taêsam sêjac biŋ kesec-kesec gêdêŋ tauŋ. Gêŋ secsêga kêkôm aê auc. Êsêac sêmasaŋ biŋ sêwiŋ tauŋ gebe senseŋ aê su janaŋa.

¹⁴O Apômtau, mago aê tec kasap aôm tôŋgeŋ. Aê kasôm gebe “Ŋoc Anôtô aôm.”

¹⁵Aôm lêmam gôjam gôliŋ ŋoc lêŋ. Amboac tonaŋ ônam aê sa aŋga ŋoc ŋacjo to lau, taŋ sêlêsu aê naŋ.

¹⁶Ôkêŋ laŋômanô êpô nêm sakiŋwaga. Onam aê sa êtu nêm têmtac gêwiŋ teŋgeŋŋa.

¹⁷O Apômtau, ôwi aê siŋ amboac gêŋ gêbac atom gebe aoc gêjac aôm. Ôkêŋ lau alôb-alôbwaga têtu gêŋ gêbacmaŋ ma toaweŋmêgeŋ sêsêp lamboam sêna.

¹⁸Ômbôc gêdôŋôlic dansaŋ auc. Êsêac tetoc tauŋ sa ma sêsôm ŋac gêdêŋ nê bôlêŋ paliŋ e sêgôm eŋ wae kêtu sec.

¹⁹Aôm gôjac nêm moasiŋ sa gêjam sêga kêtu lau, taŋ têtêc aôm naŋŋa, ma kômoasiŋ lau, taŋ sê lamu aôm naŋ, ma lau samob sêlic gêdêŋ mateŋanô.