Pesalem 30:1-8

¹O Apômtau, aê gabe aoc êôc aôm gebe gôjam aê kêsi. Ma kôkêŋ aêŋoc ŋacjo têtu samuc kêtu aê gajaŋaŋa atom.

²O Apômtau ŋoc Anôtô, aê gamôêc gêdêŋ aôm gebe ônam aê sa. Ma aôm kômoasiŋ aê, tec aê ŋajam kêsagoc.

³Apômtau, aôm tec gôwê ŋoc katuc aŋga lamboam kêpi gêmêŋ. Aôm gômôêc aê tôŋ mêŋkôkêŋ aê matoc jali kêsa kêtiam gebe jaêc su jasêp sêlêlôm jana atom.

⁴Amac lau mansaŋwaga, awem êôc Apômtau. Ma alanem ênê ŋaê dabuŋ.

⁵Gebe eŋ têtac ŋandaŋ olaŋ-olaŋ atom. Ma nê moasiŋ ênêc endeŋ tôŋgeŋ. Êmbêc tataŋ taŋiboa ma eleŋ ôliŋ êpi-êpigeŋ.

⁶Aê tec taêc gêjam e gwala kêpa su gebe “Oc jaku atomanô.”

⁷O ŋacmoasiŋ Apômtau, aôm kôwaka aê sa gaŋgôŋ ŋoc malac ŋajaŋa. Ma gôsaŋ laŋômanô auc gêdêŋ aê e katakê.

⁸O Apômtau, gêdêŋ tonaŋ aoc gêjac aôm ma kataŋ gêdêŋ ŋoc Anôtô.