Pesalem 22:19-31

¹⁹O Apômtau, ômoa jaêc aêma atom. O ŋoc ŋaclai, mêŋônam aê sa sebeŋ.

²⁰Ônam aê kêsi aŋga siŋ ma ônam aê sa aŋga kêamnêŋ gebe jamoa matoc jali.

²¹Ônam aê sa aŋga lewe awasuŋ ma ojop aê êndêŋ bôcgabuŋ ŋajabo.

²²Aê jasôm nêm ŋaê lasê êndêŋ ŋoc lasitêwai ma jalanem aôm jakô gôlôac ŋalêlôm.

²³Amac taŋ atêc Apômtau naŋ, alambiŋ eŋ. Amac samob, taŋ aŋga Jakobnê gôlôac naŋ, atoc eŋ sa. Amac samob, taŋ nêm ŋam kêsêp Israel naŋ, anac tênêp eŋ.

²⁴Gebe eŋ mataanô geo gala to gêjam dêmôê ŋac ŋalêlôm sawa, taŋ kêpô lêna tau naŋ atom. Eŋ gêsaŋ laŋôanô auc gêdêŋ eŋ atom. Apômtau kêkêŋ taŋa eŋ gêdêŋ taŋ gêmôêc gêdêŋ eŋ naŋ.

²⁵Aôm kôtu ŋoc lambiŋ, taŋ kêsa gôlôac kapôêŋ ŋalêlôm naŋ ŋamôkê. Ŋoc biŋ, taŋ gajac mata naŋ, gabe jaŋgôm êtu tôŋ jakô lau, taŋ têtêc eŋ naŋ laŋôŋnêmŋa.

²⁶Lau ŋalêlôm sawa oc sêniŋ gêŋ e êôc êsêac tôŋ. Êsêac taŋ sesom Apômtau naŋ, oc aweŋ êôc eŋ. Nêm ŋalêlôm êpi-êpi endeŋ tôŋgeŋ.

²⁷Nom ŋamadiŋ samob oc taêŋ ênam biŋ tonaŋ ma sênam tauŋ okwi dendeŋ Apômtau. Lau tomôkê-tomôkê samob oc sêu tauŋ sênêc eŋ laŋônêmŋa.

²⁸Gebe Apômtau eŋ kiŋ, eŋ tec gêjam gôliŋ lau tomôkê-tomôkê samob.

²⁹Lau towae samob aŋga nom oc sewec êndêŋ eŋ. Samob taŋ têtu kekop naŋ, to êsêac taŋ lêŋ tamac ênduŋa gêjac êsêac ŋawae naŋ, oc sewec êndêŋ eŋ amboac tonaŋgeŋ.

³⁰Lau samob, taŋ ocgo mêŋsêsa naŋ, oc sênam sakiŋ eŋ. Ma lau oc têtêku Apômtaunê miŋ êndêŋ nêŋ wakuc.

³¹Êsêac oc sênac miŋ êndêŋ lau, taŋ teneŋi sêkôc êsêac atom tageŋ naŋ, gebe Apômtau gêjam êsêac sa.