Pesalem 18:21-47

²¹Gebe aê kasa Apômtaunê lêŋ ŋapep ma kakac tauc su aŋga ŋoc Anôtônê ŋaucŋageŋ atom.

²²Ênê ŋagôliŋ samob geseŋ ŋoc intêna auc ma kamasuc ênê biŋsu teŋ atom.

²³Aê kasa ŋoc lêŋ ŋapep e eŋ gêlic aê ŋajam ma gajob tauc ŋapep gêdêŋ gêŋenseŋ aêŋa samob.

²⁴Amboac tonaŋ Apômtau kêmoasiŋ aê kêtu gamoa ŋaŋêŋŋa, kêtu aê lemoc selecŋa, tec eŋ mataanô gêlic aê jagêdêŋ.

²⁵Aôm oc ôwa taôm sa êndêŋ ŋac ŋajam gebe aôm ŋac gabêjam. Aôm oc ôwa taôm sa êndêŋ ŋac biŋŋanôŋa gebe aôm ŋac biŋŋanôŋa.

²⁶Aôm oc ôwa taôm sa êndêŋ ŋac mansaŋ gebe aôm ŋac mansaŋ, mago ŋac keso-keso, tec oc ôtôc taôm êndêŋ eŋ e êtakê.

²⁷Aôm kotoc lau mateŋ jali sa ŋapep ma kôkôniŋ lau mateŋ waô tôŋ.

²⁸Aôm kôtuŋ ŋoc ja kêpô gamêŋ ŋajam. Apômtau, ŋoc Anôtô, gêgôm ŋoc ŋakesec ŋawê kêsa.

²⁹Biŋŋanô, aôm embe ôwiŋ aê oc jalêti laŋôc êlac ŋoc ŋacjogeŋ jana. Ŋoc Anôtô embe êwiŋ aê oc jamboaŋ jaŋgêli (ŋoc ŋacjonêŋ) tuŋbôm.

³⁰Anôtô tonaŋ tec gêjam gôliŋ gêŋ samob tomalageŋ. Apômtaunê biŋ ŋakêŋkêŋ. Eŋ kêtu lau samob, taŋ sê lamu eŋ naŋ, nêŋ lautuc.

³¹Gebe anôtô teŋ oc êmoa ondoc, Apômtau eŋ taugeŋgoc. Ma lamuanô tau teŋ oc êmoa ondoc, aêacnêŋ Anôtô taugeŋgoc.

³²Anôtô tau tonaŋ tec kêjandiŋ aê tôŋ ŋa ŋaclai to gêjam ŋoc intêna gebe ockaiŋ êndiŋ gêŋ teŋ atom.

³³Ŋac tonaŋ kêkêŋ aê kasêlêŋ ŋagaô katôm isom. Eŋ ketoc aê kakô ŋoc lôc ŋamoatêc ŋaôgeŋ.

³⁴Eŋ kêdôŋ lemoc siŋŋa, tec lemoc jakêka talam ŋamadi ŋajaŋa.

³⁵Aôm gôsuŋ nêm lautuc êpiŋ aê aucŋa to nêm anôŋa kêpuc aê tôŋ. Aômnêm moasiŋ ketoc aê sa.

³⁶Aê kasêlêŋ e aôm kômasaŋ ockaiŋ ŋamala ŋapep gebe japô ocgêsu ôkwi atom.

³⁷Aê kajanda ŋoc ŋacjo e gaê êsêac tôŋ ma paŋpaŋ jagaseŋ êsêac popoc.

³⁸Aê kamakiŋ êsêac e têtu motam su ma dêdi sa kêtiam atom. Êsêac sêc ockaiŋ ŋalabu.

³⁹Aôm kôjandiŋ aê ŋa ŋaclai gebe janac siŋ ŋanô biŋŋanôgoc. Aôm kôkôniŋ ŋoc ŋacjo tôŋ e ockaiŋ kaka êsêac tôŋ.

⁴⁰Aôm kôkêŋ aêŋoc ŋacjo sêc aê sêja. Aê gaseŋ êsêac samob, taŋ sêkêŋ kisa gêdêŋ aê naŋ su.

⁴¹Êsêac sêmôêc, mago nêŋ ŋac-ênam-êsêac-sawaga teŋ gêmoa atom. Sêmôêc gêdêŋ Apômtau, mago eŋ kêkêŋ taŋa êsêac atom.

⁴²Aê kadaba êsêac sa kêtôm mu kelelo kekop. Aê kakip êsêac sa kêtôm sêpiŋ bôc-kêpêc sa aŋga malacluŋ ma sêbaliŋ siŋ.

⁴³Aôm gôjam aê sa aŋga siŋ tomôkê-tomôkê e kôkêŋ aê katu lau samuc nêŋ gôliŋwaga. Lau taŋ sêjam kauc aê naŋ, tec sêjam sakiŋ aê sêmoa.

⁴⁴Lau jaba sêŋô aê ŋawaegeŋ ma taŋeŋ wamu êndêŋ aê. Êsêac latuŋi tetoc aê sa.

⁴⁵Lau jaba latuŋi katuŋ gêjaŋa ma sêsuŋ tauŋ tênêp-tênêpgeŋ sêsa aŋga nêŋ tuŋlêlôm sêmêŋ.

⁴⁶Apômtau gêmoa mata jali. Aoc êôc ŋoc lamu. Aê jatoc ŋoc ŋacmoasiŋ Anôtô sa.

⁴⁷Anôtô tau tec kêpuc aê tôŋ e kakac ŋoc kamocgôc. Eŋ kêkôniŋ malac-malac tôŋ sêsô ŋoc gôliŋ ŋalabu.