Pesalem 18:15-31

¹⁵Gêgôm e gwêc ŋagêdimbob gêôc tau sa kêtu awê ma nom ŋataoŋ kêwaka tau sa. Gebe aôm Apômtau gôjam wambaŋ e atêm bu gwec-gwecgeŋ.

¹⁶Eŋ kêmêtôc lêma aŋga lôlôc mêŋkêkam aê tôŋ, ma gê aê sa aŋga ŋasamac kapôêŋ ŋalêlôm.

¹⁷Eŋ kêjaŋgo aê su aŋga ŋoc ŋacjo ŋaclai nê to aŋga ŋoc gobi, taŋ nêŋ ŋaclai kêlêlêc aê su naŋ nêŋ.

¹⁸Êsêac sebo sêsa dêdêŋ aê gêdêŋ ŋoc bêc wapacŋa, mago Apômtau kêpuc aê tôŋ.

¹⁹Eŋ kêkam aê sa jakakô gamêŋ kwalam. Eŋ kêsaic aê sa kasa gaja gebe têtac gêwiŋ aêgac.

²⁰Apômtau kêmoasiŋ aê kêtu laŋôcnêm sawaŋa. Eŋ gêjam aê sa kêtu lemoc selecŋa.

²¹Gebe aê kasa Apômtaunê lêŋ ŋapep ma kakac tauc su aŋga ŋoc Anôtônê ŋaucŋageŋ atom.

²²Ênê ŋagôliŋ samob geseŋ ŋoc intêna auc ma kamasuc ênê biŋsu teŋ atom.

²³Aê kasa ŋoc lêŋ ŋapep e eŋ gêlic aê ŋajam ma gajob tauc ŋapep gêdêŋ gêŋenseŋ aêŋa samob.

²⁴Amboac tonaŋ Apômtau kêmoasiŋ aê kêtu gamoa ŋaŋêŋŋa, kêtu aê lemoc selecŋa, tec eŋ mataanô gêlic aê jagêdêŋ.

²⁵Aôm oc ôwa taôm sa êndêŋ ŋac ŋajam gebe aôm ŋac gabêjam. Aôm oc ôwa taôm sa êndêŋ ŋac biŋŋanôŋa gebe aôm ŋac biŋŋanôŋa.

²⁶Aôm oc ôwa taôm sa êndêŋ ŋac mansaŋ gebe aôm ŋac mansaŋ, mago ŋac keso-keso, tec oc ôtôc taôm êndêŋ eŋ e êtakê.

²⁷Aôm kotoc lau mateŋ jali sa ŋapep ma kôkôniŋ lau mateŋ waô tôŋ.

²⁸Aôm kôtuŋ ŋoc ja kêpô gamêŋ ŋajam. Apômtau, ŋoc Anôtô, gêgôm ŋoc ŋakesec ŋawê kêsa.

²⁹Biŋŋanô, aôm embe ôwiŋ aê oc jalêti laŋôc êlac ŋoc ŋacjogeŋ jana. Ŋoc Anôtô embe êwiŋ aê oc jamboaŋ jaŋgêli (ŋoc ŋacjonêŋ) tuŋbôm.

³⁰Anôtô tonaŋ tec gêjam gôliŋ gêŋ samob tomalageŋ. Apômtaunê biŋ ŋakêŋkêŋ. Eŋ kêtu lau samob, taŋ sê lamu eŋ naŋ, nêŋ lautuc.

³¹Gebe anôtô teŋ oc êmoa ondoc, Apômtau eŋ taugeŋgoc. Ma lamuanô tau teŋ oc êmoa ondoc, aêacnêŋ Anôtô taugeŋgoc.