Pesalem 147:6-20

⁶Apômtau gêjam lau ŋasec sa ma kêtiŋ alôb-alôbwaga piŋpaŋ jasêc nom.

⁷Apuc Apômtaunê wê daŋgeŋa sa. Aŋgôm gêŋ wêŋa êtaŋ êndêŋ aêacnêŋ Anôtô.

⁸Eŋ kêkêŋ tao gêsac umboŋ ma kêkêŋ kom kêmalôm nom to kêkêŋ gêgwaŋ kêpuc aŋga lôc.

⁹Eŋ gêlôm bôc ma kêkêŋ mo gêdêŋ aoco ŋalatu, taŋ têtaŋ gêdêŋ eŋ naŋ.

¹⁰Eŋ têtac gêwiŋ hos ŋaclai atom to gêlic ŋamalac, taŋ labum ŋajaŋa naŋ ŋajam atom.

¹¹Apômtau têtac gêwiŋ lau, taŋ têtêc eŋ naŋ, to têtac gêwiŋ lau, taŋ sêkêŋ mateŋ ênê têtac gêwiŋ teŋgeŋŋa naŋ.

¹²O Jerusalem, ôlanem Apômtau. O Sion, ônam wê êndêŋ nêm Anôtô.

¹³Gebe eŋ kêmasaŋ nêm katam ŋajaŋa. Eŋ gêjam mec nêm ŋapalê, taŋ sêmoa nêm ŋalêlôm naŋ.

¹⁴Eŋ kêbalaŋ nêm gamêŋ ŋamadiŋ auc ŋapep ma gêlôm aôm gôŋgôŋ moasu ŋaôgeŋ.

¹⁵Eŋ kêsakiŋ nê jatu kêsêp nom gêmêŋ ma biŋ tau kêlêti gêjam nom aucgeŋ sep tageŋ gêja.

¹⁶Eŋ kêkêŋ sno kêtôm kapok ma kêkêŋ nop kêtôm wao.

¹⁷Eŋ kêpalip nê kompoc kêtôm poclô. Asa oc êôc ênê malotêna tôŋ.

¹⁸Eŋ kêkêŋ nê biŋ e gêŋ tau gêwê. Eŋ kêkêŋ nê mu, tec ŋabu keseleŋ.

¹⁹Eŋ gêwa nê biŋ sa gêdêŋ Jakob ma kêsôm nê gôliŋ to biŋgêdêŋ lasê gêdêŋ Israel.

²⁰Eŋ kêmoasiŋ tenteŋlatu teŋ amboac tonaŋ atom. Êsêac sêjala ênê biŋsu atom. Aleluja.