Pesalem 145:4-19

⁴Gôlôac teŋ sêlanem aômnêm koleŋ êndêŋ gôlôac teŋ sêŋô ma sêsôm aômnêm ŋaclai ŋagêŋsêga lasê.

⁵Êsêac oc sêsôm aômnêm ŋawasi to waem kiŋŋa lasê, ma aê gabe jaŋga wê êpi nêm gêŋsêga.

⁶Lau oc sêsôm aômnêm gêŋsêga ŋaŋaclai lasê ma aê gabe jawa aômnêm waem kapôêŋ sa.

⁷Lau oc sênac aômnêm moasiŋ teŋgeŋŋa ŋamiŋ to têtu samuc aômnêm biŋgêdêŋ toôndugeŋ.

⁸Apômtau eŋ ŋac moasiŋ to taê walô ŋam. Eŋ gêbiŋ tôŋ ma têtac gêwiŋ teŋgeŋŋa gêjam eŋ auc.

⁹Apômtau eŋ ŋajam gêdêŋ ŋamalac samob ma eŋ taê labu gêŋ samob, taŋ kêkêŋ naŋ.

¹⁰O Apômtau, gêŋ samob, taŋ kôkêŋ naŋ, sênam daŋge aôm. Ma nêm lau mansaŋ sêlanem aôm.

¹¹Êsêac oc sêsôm aômnêm gamêŋ kiŋŋa ŋawae lasê ma sênac aômnêm ŋaclai ŋamiŋ

¹²gebe ŋamalacnêŋ latuŋi sêŋô aômnêm gêŋsêga to aômnêm gamêŋ kiŋŋa ŋawasi ŋanô ŋawae.

¹³Aômnêm gamêŋ kiŋŋa ênêc teŋgeŋ ma ônam gôliŋ gôlôac to gôlôac ŋêŋgen êna. Apômtau gêgôm nê biŋ samob ŋanô kêsa ma nê koleŋ samob gêwa ênê têtac gêwiŋ sa.

¹⁴Apômtau kêpuc lau samob, taŋ sebeŋ naŋ tôŋ ma gêjac êsêac samob, taŋ sêŋgôŋ sêpô dêducgeŋ naŋ sa.

¹⁵Lau samob mateŋ gêdiŋ aôm ma aôm kôkêŋ êsêacnêŋ mo gêdêŋ ŋanoc.

¹⁶Aôm kôlaiŋ lêmamtapa ma gôlôm gêŋ mateŋ jali samob e gêôc êsêac tôŋ.

¹⁷Apômtau gêgôm nê gêŋ samob gêdêŋgeŋ ma gêgôm nê gêŋ samob tomoasiŋgeŋ.

¹⁸Apômtau gêmoa êsêac, taŋ aweŋ gêjac eŋ naŋ ŋagala ma gêwiŋ êsêac samob, taŋ aweŋ gêjac eŋ toŋanôgeŋ naŋ.

¹⁹Eŋ gêjam êsêac, taŋ têtêc eŋ naŋ, nêŋ sêpô lêna sa to gêŋô êsêacnêŋ taŋiboa ma kêpuc êsêac tôŋ.