Pesalem 143:2-10

²Ôkic nêm sakiŋwaga nê biŋ atom gebe aôm ôlic ŋamalac mata jali teŋ êtôm ŋac gêdêŋ atom.

³Ojae, ŋacjo tau kêjanda katuc. Eŋ kêku aê tulu jagaêc nom ma aê katôm êsêac, taŋ sêmac êndu su naŋ.

⁴Aêŋoc katuc ôluŋ-ôluŋgeŋ e ŋoc ŋalêlôm kêtu toŋ aŋga ŋoc waŋlêlôm.

⁵Aê taêc gêjam têm gêmuŋ andaŋgeŋŋa ma taêc gêjam aômnêm lêmam ŋakôm samob, taŋ gôgôm naŋ. Taêc gêjam jakêsêp aômnêm gôliŋ samob.

⁶Aê galam lemoc ma kateŋ mec gêdêŋ aôm. Aêŋoc katuc gêjam awa su aôm kêtôm nom ŋakeleŋ kêsê awa gebe kom ênac.

⁷O Apômtau, ôkac taômgeŋ mêŋôkêŋ taŋam aê. Ŋoc ŋalêlôm kêtu dambê-dambê su gebe janaŋa. Ônsaŋ laŋômanô auc êndêŋ aê atom gebe jatôm êsêac, taŋ sê su sêsêp sêlêlôm sêja naŋ atom.

⁸Ôkêŋ aê jaŋô aômnêm têmtac gêwiŋ teŋgeŋŋa ŋawae êndêŋ eleŋŋa gebe aê taêc kêka aôm. Ôtôc intêna, taŋ gobe aê jasa naŋ, êndêŋ aê gebe jasuŋ ŋoc katuc sa êndêŋ aôm êwac.

⁹O Apômtau, ônam aê kêsi êndêŋ ŋoc ŋacjo. Aê jandêŋ aôm wacjaê lamu aôm.

¹⁰Ôndôŋ aê jaŋgôm ŋoc gêŋ êtôm aôm gôlic ŋajam gebe aêŋoc Anôtô aôm. Aômnêm Ŋalau ŋajam êwê aê jasa lêŋ ŋaŋêŋ.