Pesalem 139:10-24

¹⁰oc lêmam êwê aê aŋga ônê ma ôsip aê sa ŋa nêm anôŋa.

¹¹Ma aê embe jasôm gebe gêsuŋbôm êkôm aê auc samucgeŋ ma ŋawê, taŋ kêpô aê naŋ, ênam kesec,

¹²mago aôm oc ôlic ŋakesec amboac ŋakesec atom. Ôlic gêbêcauc amboac eleŋŋa ma ŋakesec amboac ŋawê.

¹³Aôm taômgeŋ tec kôkêŋ aêŋoc ŋalêlôm ma kôlêsôb aê aŋga tinoc têtaclêlôm.

¹⁴Aê gajam daŋge aôm gebe kôkêŋ aê ŋamêtê kaiŋ teŋ. Aêŋoc katuc kêjala gebe aômnêm gêŋ, taŋ gôgôm naŋ, kêtu gêŋsêga kaiŋ teŋ.

¹⁵Aôm kôjala ŋoc ŋatêkwa ŋasec-ŋasec samob gêdêŋ taŋ kôkêŋ aê kelec-kelec kôsiŋgeŋ ma kôlêsôb aê aŋga tinoc têtaclêlôm.

¹⁶Matamanô gôlic aê gêdêŋ taŋ aê ŋanô kêsa atomgeŋ ma koto ŋoc bêc, taŋ taêm gêjam gebe jaŋgôŋŋa naŋ, gêc nêm buku kwanaŋgeŋ. Gôgôm gêmuŋ kêsêp ŋasawa, naŋ ŋoc bêc teŋ mêŋkêsa atomanô naŋ.

¹⁷O Anôtô, biŋ taŋ aôm taêm gêjam naŋ, ŋawapac, oc jajala amboac ondoc. Gêŋ tonaŋ taêsam e ŋalêlêma atom.

¹⁸Aê embe jasa sa, oc jalic êlêlêc gaŋac su. Aê embe janêc e guluŋ jandi, naŋ jatap aôm sa.

¹⁹O Anôtô, ônac alôb-alôbwaga êndumaŋ ma ôkêŋ lau, taŋ sêwê kaiŋ dec naŋ, sêc su aŋga aêŋoc.

²⁰Lau tonaŋ tec sêkiaŋ tauŋ sa ma sêsôm biŋ alôb-alôb kêpi aôm ma sêgôm aômnêm ŋaê kêtu meloc.

²¹O Apômtau, aê oc jakêŋ kisa êndêŋ lau, taŋ sêkêŋ kisa gêdêŋ aôm naŋ, atom me. Ma janam laŋôcanô ôkwi êndêŋ lau, taŋ sêli tauŋ sa gêdêŋ aôm naŋ, atom me.

²²Biŋŋanô, aê kakêŋ kisa gêdêŋ êsêac ŋajaŋa, galic êsêac têtu ŋoc ŋacjo.

²³O Anôtô, ômbi aê lêtêŋ e ôjala ŋoc ŋalêlôm. Ônsaê aê to ôjala gêŋ, taŋ taêc gêjam naŋ.

²⁴Ma embe ôlic aê jasa lêŋ dansaŋ jamoa, naŋ ôwê aê jasa lêŋ ŋaŋêŋŋa.