Pend-nesihetler 4:2-22

²Chünki silerge ögitidighanlirim yaxshi bilimdur, Körsetmilirimdin waz kechmenglar.

³Chünki menmu atamning yumran balisi idim, Anamning arzuluq yalghuz oghli idim,

⁴Atam manga ögitip mundaq dédi: — Sözlirimni ésingde tut; Körsetmilirimge riaye qil, Shuning bilen yashnaysen.

⁵Danaliqni alghin, eqil tap, Éytqan sözlirimni untuma, ulardin chiqma.

⁶Danaliqtin waz kechme, u séni saqlaydu; Uni söygin, u séni qoghdaydu.

⁷Danaliq hemme ishning béshidur; Shunga danaliqni alghin; Barliqingni serp qilip bolsangmu, eqil tapqin.

⁸Danaliqni ezizligin, u séni kötüridu, Uni ching quchaqlighanda, séni hörmetke sazawer qilidu.

⁹Béshinggha taqalghan gül chembirektek sanga güzellik élip kélidu, Sanga shöhretlik taj inam qilidu.

¹⁰I oghlum, qulaq salghin, sözlirimni qobul qilghin, Shunda ömrüngning yilliri köp bolidu.

¹¹Men sanga danaliq yolini ögitey, Séni durusluq yollirigha bashlay.

¹²Mangghiningda qedemliring cheklenmeydu, Yügürseng yiqilip chüshmeysen.

¹³Alghan terbiyengni ching tut, Qolungdin ketküzmigin; Obdan saqlighin uni, Chünki u séning hayatingdur.

¹⁴Yaman ademler mangghan yolgha kirme, Rezillerning izini basma.

¹⁵Ularning yolidin özüngni qachur, Yoligha yéqin yolima; Uningdin yandap ötüp ket, Néri ketkin.

¹⁶Chünki yamanlar birer rezillik qilmighuche uxliyalmas, Birersini yiqitmighuche uyqusi kelmes.

¹⁷Yamanliq ularning ozuqidur, Zorawanliq ularning sharabidur.

¹⁸Lékin heqqaniylarning yoli goya tang nuridur, Kün chüsh bolghuche barghanséri yoruydu.

¹⁹Yamanlarning yoli zulmet kéchidek qapqarangghu, Ular yiqilip, némige putliship ketkinini bilmeydu.

²⁰I oghlum, sözlirimni köngül qoyub angla, Geplirimge qulaq sal.

²¹Ularni közüngde tutqin, Yürikingning qétida qedirlep saqlighin.

²²Chünki sözlirim tapqanlar üchün hayattur, Ularning pütün ténige salametliktur.